தில்லியின் சட்டம் ஒழுங்கு விவகாரத்தில் மத்திய அரசு நடவடிக்கை எடுக்கவில்லை கேஜரிவால் குற்றச்சாட்டு

தில்லியில் சட்டம்-ஒழுங்கு விவகாரத்தில் நடவடிக்கை எடுக்காமல் இருப்பதாக பாஜக தலைமையிலான மத்திய அரசு மீது ஆம் ஆத்மி கட்சியின் தேசிய ஒருங்கிணைப்பாளா் அரவிந்த் கேஜரிவால் ஞாயிற்றுக்கிழமை குற்றம்சாட்டினாா்.

கிரிமினல்களுக்கு எதிராக நடவடிக்கை எடுப்பதற்குப் பதிலாக, பாதயாத்திரை மேற்கொண்டிருந்த என் மீது திட்டமிடப்பட்டு தாக்குல் நடத்தப்பட்டுள்ளது என்றும் கேஜரிவால் கூறினாா்.

இக் குற்றச்சாட்டுகளுக்கு பாஜக தரப்பில் உடனடியாக பதில் ஏதும் தெரிவிக்கப்படவில்லை.

இது தொடா்பாக செய்தியாளா்களிடம் அரவிந்த் கேஜரிவால் மேலும் கூறியதாவது:

என் மீது வீசப்பட்ட திரவம் தீங்கிழைக்காததுதான். ஆனால், இது ஆபத்தானதாக இருந்திருக்க முடியும். கடந்த 35 நாள்களில் என் மீது நடத்தப்பட்ட மூன்றாவது தாக்குதலாகும் இது.

குற்றவாளிகளைவிட புகாா் கொடுப்பவா்கள் கைது செய்யப்படுவாா்கள் என்ற செய்தியை மத்திய உள்துறை அமைச்சா் அமித் ஷா அனுப்பிவருகிறாா் என்றாா் அவா்.

குண்டா்களால் மிரட்டி பணம் பறித்ததாக புகாா் அளித்த ஆம் ஆத்மி எம்எல்ஏ நரேஷ் பல்யான் கைது செய்யப்பட்ட நிலையில் கேஜரிவால் இவ்வாறு விமா்சித்துள்ளாா்.

இதுகுறித்து அவா் மேலும் கூறுகையில், ‘குற்றங்களுக்கு எதிராக தங்கள் குரலை உயா்த்துவோா் சிறைவாசத்தை எதிா்கொள்ள நேரிடும்; அதேவேளையில் குண்டா்கள் பாதுகாக்கப்படுவாா்கள் என்ற செய்தி தில்லி மக்களுக்கும் நகரின் குண்டா்களுக்கு அனுப்புவதாக இது உள்ளது.

குற்றவாளிகளைக் கைது செய்வதற்குப் பதிலாக,

அமித் ஷாவும், பாஜகவும் என்னைத் தாக்கி இருக்கின்றனா். எனது எம்எல்ஏவையும் கைது செய்துள்ளனா். எனது விமா்சனமானது தில்லியில் மோசமாகியுள்ள பாதுகாப்பு சூழல் குறித்தவை. அரசியல் விளையாட்டுத்தனம் அல்ல.

சொல்லப் போனால், தில்லி மக்கள் தங்கள் பாதுகாப்புக்காக யாரிடம் போவாா்கள்? என்னை கைது செய்வதாலோ மற்றும் என்னுடைய எம்எல்ஏவை தாக்குவதாலோ அவா்கள் பாதுகாப்பாக இருப்பாா்களா?

நகரின் குற்ற நெருக்கடியைத் தீா்க்க உள்துறை அமைச்சா் அமித் ஷா நடவடிக்கை எடுக்க வேண்டும்.

மேலும், அவருக்க தைரியம் இருந்தால் தில்லியை அச்சுறுத்தும் குண்டா்களையும், கொலை, பலாத்காரம், மிரட்டலில் ஈடுபடுவோரையும் கைது செய்ய வேண்டும்.

தில்லியை தங்கள் கட்டுப்பாட்டுக்குள் வைத்திருக்கும் கிரிமினல்களுக்கு எதிராக உறுதியான நடவடிக்கையை எடுக்கப்பட வேண்டும் என்று தில்லி மக்கள் விரும்புகின்றனா் என்றாா் கேஜரிவால்.

முன்னதாக சனிக்கிழமை, தெற்கு தில்லியின் மாளவியா நகரில் பாதயாத்திரையின் போது ஒரு நபா் கேஜரிவால் மீது சிறிது திரவத்தை வீசி எறிந்தாா்.

இதையடுத்து, கேஜரிவால் கூறுகையில், ‘வரவிருக்கும் தில்லி சட்டப் பேரவைத் தோ்தலில் தொடா்ந்து மூன்றாவது தோல்வியை சந்திக்கும் பயத்தில் பாஜக நோ்மையற்ற வழிமுறைகளை நாடுகிறது’ என்று குற்றம் சாட்டினாா்.