தூத்துக்குடி சிவன் கோயில் என அழைக்கப்படும் அருள்மிகு பாகம்பிரியாள் உடனுறை சங்கர ராமஸ்வரா் கோயிலில் கந்த சஷ்டி திருவிழாவை முன்னிட்டு சூரசம்ஹார நிகழ்ச்சி வியாழக்கிழமை நடைபெற்றது.
இக்கோயிலில் அமைந்துள்ள அருள்மிகு சுப்பிரமணிய சுவாமி சந்நிதியில் கந்த சஷ்டி விழா கடந்த 2ஆம் தேதி யாகசாலை பூஜையுடன் தொடங்கியது. தொடா்ந்து நாள்தோறும் இரவு அருள்மிகு சுப்பிரமணிய சுவாமி சிறப்பு அலங்காரத்தில் பித்தளை சப்பரத்தில் வீதியுலா வந்து பக்தா்களுக்கு அருள்பாலித்தாா். சிகர நிகழ்வான சூரசம்ஹாரம் வியாழக்கிழமை நடைபெற்றது. இதையொட்டி விரதமிருந்த பக்தா்கள் முருகனை தங்கள் வாயில் 1அடி முதல் 6 அடி வரையிலான அழகு குத்தியும், காவடி எடுத்தும், பால்குடம் எடுத்தும் காலையில் ஊா்வலமாக சென்றனா். இந்த ஊா்வலம் தூத்துக்குடி தெப்பக்குளத்தில் அமைந்துள்ள விநாயகா் கோயிலில் தொடங்கி முருகன் கோயிலை அடைந்தது. அங்கு சுவாமிக்கு பாலபிஷேகம் செய்யப்பட்டு சிறப்பு பூஜை நடைபெற்றது.
தொடா்ந்து சூரனை முருகப்பெருமான் வதம் செய்யும் சூரசம்ஹார நிகழ்வில், சுப்ரமணியசாமி வேல் வாங்கும் நிகழ்ச்சியும் இதை தொடா்ந்து சூரன் வீதி உலாவும் நடைபெற்றன. இதைத் தொடா்ந்து, மலா்களால் அலங்கரிக்கப்பட்ட பித்தளை சப்பரத்தில் சுப்பிரமணிய சுவாமி எழுந்தருளி வெள்ளி வேல் மூலம் முதலில் கஜ முகத்துடன் வந்த சூரனையும், பின்னா் சிங்கமுகத்துடன் வந்த சூரனையும் வதம் செய்தாா். மேலும் சூரன் தலையுடனும், மாமரத்தில் மறைந்தபடி சேவல் தலையுடன் வந்த சூரபத்மனை வதம் செய்யும் நிகழ்ச்சி நடைபெற்றது. இந்நிகழ்வின்போது, கூடி இருந்த ஆயிரக்கணக்கான பக்தா்கள், வேல் வேல் முருகனுக்கு அரோகரா அரோகரா என பக்தி முழங்கமிட்டனா். சுப்பிரமணியருக்கு சிறப்பு தீபாராதனை நடைபெற்றதும் பக்தா்கள் தங்கள் விரதத்தை கலைத்து உணவு அருந்தினா். இதில் ஆயிரக்கணக்கான பக்தா்கள் பங்கேற்றனா்.
தொடா்ந்து, வெள்ளிக்கிழமை காலை 7.30 மணிக்கு அருள்மிகு தெய்வானை அம்பாள் தவசுக்கு எழுந்தருளல் நிகழ்ச்சியும், மாலை 4.35 மணிக்கு சுப்பிரமணிய சுவாமி காட்சிக்கு எழுந்தருளும் நிகழ்ச்சியும் நடைபெறும். மாலை 6.05 மணிக்கு மாலை மாற்றும் நிகழ்ச்சி நடைபெறும். இரவு 7 மணிக்கு திருக்கல்யாணம் நடைபெறும். தொடா்ந்து திருமாங்கல்யம் பூட்டுதல், தீபாராதனை, பட்டணப் பிரவேசம் ஆகிய நிகழ்ச்சிகள் நடைபெறும்.
இதற்கான ஏற்பாடுகளை ஸ்ரீ சுப்பிரமணிய சுவாமி மகமை பரிபாலன சங்கத்தினா் செய்துள்ளனா்.
