நாகை மாவட்ட விளையாட்டு அரங்கில் மின்னொளி வசதி அமைச்சா் பாா்வையிட்டாா்

நாகை மாவட்ட விளையாட்டு அரங்கில் செய்யப்பட்டுள்ள வசதிகள் குறித்து சனிக்கிழமை பாா்வையிட்ட பள்ளிக்கல்வித் துறை அமைச்சா் அன்பில் மகேஸ் பொய்யாமொழி.

நாகப்பட்டினம், டிச. 28: நாகை மாவட்ட விளையாட்டரங்கில் இரவு நேரம் நடைபயிற்சி மற்றும் விளையாட்டு பயிற்சி மேற்கொள்ளும் வகையில், மின்னொளி வசதி ஏற்படுத்தப்பட்டுள்ளது. இதை பள்ளிக் கல்வித்துறை அமைச்சா் அன்பில் மகேஸ் பொய்யாமொழி சனிக்கிழமை பாா்வையிட்டாா்.

கடந்த 2000-ஆம் ஆண்டு தொடங்கப்பட்ட நாகை டாக்டா் கலைஞா் மாவட்ட விளையாட்டரங்கில் 400 மீட்டா் ஓடுதளம், கையுந்து பந்து, கால்பந்து, டென்னிஸ், கைப்பந்து, கூடைப்பந்து, கோ கோ மற்றும் கபடி ஆடு களங்கள், பல்நோக்கு உள் விளையாட்டரங்கம், இறகுபந்து உள் விளையாட்டரங்கம், ஸ்குவாஷ் உள் விளையாட்டரங்கம், நவீன உடற்பயிற்சி கூடம் மற்றும் நீச்சல் குளம் ஆகிய வசதிகள் உள்ளன.

இந்நிலையில், விளையாட்டரங்கில் இரவு நேரங்களில் விளையாட்டு வீரா்கள் பயிற்சி மேற்கொள்ளவும், பொதுமக்கள் நடைபயிற்சி மேற்கொள்ளவும் மின்னொளி வசதி ஏற்படுத்த மாவட்ட பொறுப்பு அமைச்சரும், பள்ளி கல்வித்துறை அமைச்சருமான அன்பில் மகேஸ் பொய்யாமொழி அறிவுறுத்திருந்தாா்.

இதையடுத்து மாவட்ட ஆட்சியா் ப. ஆகாஷ் முயற்சியில் ரூ. 7.57 லட்சத்தில் மின்னொளி வசதி ஏற்படுத்தப்பட்டது. இதை அமைச்சா் சனிக்கிழமை பாா்வையிட்டாா்.

நாகை மக்களவை உறுப்பினா் வை. செல்வராஜ், மீன்வளா்ச்சி கழகத் தலைவா் என். கௌதமன், தாட்கோ தலைவா் உ. மதிவாணன், கீழ்வேளுா் சட்டப்பேரவை உறுப்பினா் வி.பி. நாகை மாலி மாவட்ட ஊராட்சித் தலைவா் ச.உமா மகேஸ்வரி, நாகை நகா்மன்ற தலைவா் இரா. மாரிமுத்து, துணைத் தலைவா் செந்தில்குமாா், வேளாங்கண்ணி பேரூராட்சி துணைத் தலைவா் தாமஸ் ஆல்வா எடிசன் உள்ளிட்டோா் உடனிருந்தனா்.