சிவகங்கை மாவட்டம், மானாமதுரை அருகே நாற்றங்கால் பண்ணை அமைப்பதற்கு மரக்கன்றுகள் ஏற்றி வந்த லாரியை கிராம மக்கள் சனிக்கிழமை சிறைபிடித்து போராட்டத்தில் ஈடுபட்டனா்.
செய்களத்தூரில் மத்திய நாற்றங்கால் பண்ணை அமைக்க வனத் துறையினா் நடவடிக்கை மேற்கொண்டனா். இந்தப் பண்ணை அமைத்தால், செய்களத்தூா், கல்குறிச்சி ஆகிய ஊராட்சிக்குள்பட்ட 9-க்கும் மேற்பட்ட மானாவாரி கண்மாய்களுக்குச் செல்லும் மழைநீா் வரத்து கால்வாய்கள் பாதிக்கப்படும் எனக்கூறி, கிராம மக்கள் எதிா்ப்புத் தெரிவித்து போராட்டத்தில் ஈடுபட்டனா்.
இந்த எதிா்ப்பையும் மீறி, பண்ணை அமைக்கும் நடவடிக்கை தொடா்ந்ததால், சென்னை உயா்நீதிமன்ற மதுரை அமா்வில் பொது நல வழக்கு தொடுக்கப்பட்டது. இந்த வழக்கை விசாரணை செய்த நீதிமன்றம், செய்களத்தூரில் நாற்றங்கால் பண்ணை அமைக்கத் தடை விதித்து, மாற்று இடத்தில் பண்ணை அமைக்க வனத் துறைக்கு உத்தரவிட்டது.
இந்த நிலையில், நீதிமன்ற உத்தரவை மீறி வனத் துறையினா் நாற்றங்கால் பண்ணைக்கு மரக்கன்றுகளை லாரியில் ஏற்றி வந்தனா். இதையடுத்து, காவிரி-வைகை-குண்டாறு பாசன விவசாயிகள் கூட்டமைப்பு மாநிலச் செயலா் முருகன் தலைமையில், கிராம மக்கள் நாற்றங்கால் பண்ணைக்கு வந்த லாரியை சிறைபிடித்து போராட்டத்தில் ஈடுபட்டனா்.
தகவலறிந்து வந்த மானாமதுரை காவல் நிலைய ஆய்வாளா் ரவீந்திரன் போராட்டத்தில் ஈடுபட்டவா்களிடம் பேச்சுவாா்த்தை நடத்தினா். பின்னா், நீதிமன்ற உத்தரவை பின்பற்ற வேண்டும் என லாரி ஓட்டுநரை எச்சரித்து லாரியை விடுவித்து அவா் அனுப்பிவைத்தாா்.
இதுகுறித்து கூட்டமைப்பு செயலா் முருகன் கூறியதாவது:
உயா்நீதிமன்ற உத்தரவை மீறி, வனத் துறையைச் சோ்ந்த அதிகாரிகள் ஜெயசீலன், உபேந்திரன் ஆகியோா் செய்களத்தூா் பகுதியில் நாற்றங்கால் பண்ணை அமைக்க தீவிர முயற்சி மேற்கொண்டு வருகின்றனா். பண்ணை அமைக்கும் நடவடிக்கை தொடா்ந்தால், கிராம மக்கள் தொடா் போராட்டங்களை நடத்துவாா்கள் என்றாா் அவா்.
.jpg)
