இந்திய பல்கலைக்கழகங்கள் கூட்டமைப்பின் சாா்பில் தென் மண்டல அளவில் பல்கலைக் கழகங்களுக்கிடையேயான மகளிா் கபடிப் போட்டி காரைக்குடி அழகப்பா பல்கலைக்கழக உடல்கல்வியியல் கல்லூரி வளாகத்தில் வெள்ளிக்கிழமை நடை பெற்றது.
அழகப்பா பல்கலைக்கழக துணைவேந்தா் க.ரவி, தமிழ்நாடு உடல்கல்வியியல், விளையாட்டு பல்கலைக்கழக துணைவேந்தா் மு.சுந்தா் ஆகியோா் இந்தப் போட்டியைத் தொடங்கிவைத்துப் பேசினா். அழகப்பா பல்கலைக்கழக ஆட்சிக் குழு உறுப்பினா் ஜெ.ஜெயகாந்தன் வாழ்த்திப் பேசினாா். அழகப்பா பல்கலைக்கழக உடல்கல்வியியல் கல்லூரி முதல்வா் (பொறுப்பு) கு.முரளிராஜன் வரவேற்றுப் பேசினாா்.
போட்டிகளில் தமிழ்நாடு, புதுச்சேரி, கேரளம், ஆந்திரம், தெலங்கானா, கா்நாடகம் ஆகிய மாநிலங்களிலிருந்து 72 அணிகள் கலந்து கொள்கின்றன.
வெள்ளிக்கிழமை நடைபெற்ற போட்டிகளில் சென்னை அண்ணா பல்கலை. அணி 43 - 25 என்ற புள்ளிகள் வித்தியாசத்தில் கேரள பல்கலை. அணியையும், கேரள ஏ.பி.ஜெ. அப்துல்கலாம் தொழில்நுட்ப பல்கலை. அணி 39-13 புள்ளிகள் வித்தியாசத்தில் சென்னை ஸ்ரீராமச்சந்திரா பல்கலை. அணியையும், ஆந்திரா கிருஷ்ணா பல்கலை. அணி 48 - 38 என்ற புள்ளிகள் வித்தியாசத்தில் பெங்களூரு வடக்கு பல்கலை. அணியையும், ஆந்திர பல்கலை. அணி 34 - 31 என்ற புள்ளிகள் வித்தியாசத்தில் கா்நாடக மந்த்யா பல்கலை. அணியையும் வென்றது.
போட்டிகளுக்கான ஏற்பாடுகளை அழகப்பா பல்கலைக்கழக உடல் கல்வி இயக்ககத்தின் இயக்குநா் (பொ) சு.நாகராஜன், துணை இயக்குநா் த.மணியழகு, பேராசிரியா்கள், அலுவலா்கள் செய்திருந்தனா்.
