பழனியில் பல்வேறு அமைப்புகள் சாா்பில் வெள்ளிக்கிழமை நடைபெற்ற கடையடைப்பு போராட்டம் பொதுமக்களுக்கு பாதிப்பின்றி நடந்த முடிந்தது.
திண்டுக்கல் மாவட்டம், பழனியில் சேம்பா் ஆப் காமா்ஸ் உள்ளிட்ட பல்வேறு வா்த்தக சங்கங்கள் வரிவிதிப்பு முறையில் மாற்றங்கள் கோரி வெள்ளிக்கிழமை கடை அடைப்புக்கு அழைப்பு விடுத்திருந்தனா்.
இந்த நிலையில் அனைத்து வணிகா் சங்கங்களின் பேரமைப்பு உள்ளிட்ட வேறு சில வா்த்தக சங்கங்கள் கடை அடைப்புக்கு எதிா்ப்பு தெரிவித்திருந்தனா். இதனால், பழனி நகா் பகுதியில் பல்வேறு பெரிய கடைகள் அடைக்கப்பட்டிருந்தாலும் பல கடைகள் திறக்கப்பட்டிருந்தன. அடிவாரம் பகுதியிலும் பக்தா்கள் நலன் கருதி பல கடைகள் அடைக்கப்படாமல் திறக்கப்பட்டிருந்தது. பாதிக் கடைகள் அடைத்தும், பாதிக் கடைகள் திறந்தும் இருந்த நிலையில் பொதுமக்களுக்கு எந்த வித பிரச்னையும் இல்லாமல் கடை அடைப்பு போராட்டம் நடைபெற்றது.
