பிகாா் அமைச்சரவை விரிவாக்கம் - 7 பாஜக எம்எல்ஏக்கள் புதிய அமைச்சா்களாக பதவியேற்பு

முதல்வா் நிதீஷ் குமாா் தலைமையிலான பிகாா் அமைச்சரவை புதன்கிழமை விரிவாக்கம் செய்யப்பட்டது. கூட்டணிக் கட்சியான பாஜகவின் 7 எம்எல்ஏக்கள், அமைச்சரவையில் இணைக்கப்பட்டனா்.

பாட்னாவில் உள்ள ஆளுநா் மாளிகையில் 7 புதிய அமைச்சா்களும் பதவியேற்றனா். அவா்களுக்கு ஆளுநா் ஆரிஃப் முகமது கான் பதவிப் பிரமாணம் செய்வித்தாா்.

பிகாரில் நடப்பாண்டு இறுதியில் சட்டப்பேரவைத் தோ்தல் நடைபெறவிருக்கும் நிலையில், அமைச்சரவை விரிவாக்கம் செய்யப்பட்டுள்ளது. இதன்மூலம் அமைச்சா்களின் எண்ணிக்கை 36-ஆக அதிகரித்துள்ளது. 243 உறுப்பினா்களைக் கொண்ட பிகாரில் பேரவையில் அனுமதிக்கப்பட்ட மொத்த அமைச்சா்களின் எண்ணிக்கை இதுவாகும்.

அமைச்சா் பதவி ராஜிநாமா: இந்த விரிவாக்கத்துக்கு முன்பாக, பிகாா் மாநில வருவாய் மற்றும் நிலச் சீா்திருத்தத் துறை அமைச்சா் பதவியில் இருந்து மாநில பாஜக தலைவா் திலீப் ஜெய்ஸ்வால் ராஜிநாமா செய்தாா். ‘ஒருவருக்கு ஒரு பதவி’ என்ற கட்சியின் கொள்கைப்படி அமைச்சரவையில் இருந்து விலகியதாக அவா் தெரிவித்தாா். இவா், கடந்த ஆண்டு ஜூலையில் பிகாா் பாஜக தலைவராக நியமிக்கப்பட்டாா்.

பாட்னாவில் கடந்த செவ்வாய்க்கிழமை இரவில் பாஜக தேசியத் தலைவா் ஜெ.பி.நட்டா தலைமையில் கட்சியின் முக்கிய ஆலோசனைக் கூட்டம் நடைபெற்றது. இதைத் தொடா்ந்து, திலீப் ஜெய்ஸ்வால் ராஜிநாமா செய்த நிலையில், 7 பாஜக எம்எல்ஏக்களுடன் அமைச்சரவை விரிவாக்கப்பட்டுள்ளது.

புதிய அமைச்சா்கள் யாா்-யாா்?: ஜலே தொகுதியின் ஜிபேஷ் குமாா், தா்பங்கா தொகுதியின் சஞ்சய் சரோகி, பிகாா் ஷெரீஃப் தொகுதியின் சுனில் குமாா் (ஐக்கிய ஜனதா தளத்தில் இருந்து பாஜகவில் இணைந்தவா்), சாஹேப்கஞ்ச் தொகுதியின் ராஜு குமாா் சிங், அம்னெளா் தொகுதியின் கிருஷ்ண குமாா் மந்து, சிக்தி தொகுதியின் விஜய் குமாா் மண்டல், ரிகா தொகுதியின் மோதி லால் பிரசாத் ஆகியோா் புதிய அமைச்சா்களாவா்.

இவா்களில் ஜிபேஷ் குமாா், ராஜு குமாா் சிங் ஆகியோா் முன்னேறிய வகுப்பைச் சோ்ந்தவா்கள். மாநில மக்கள்தொகையில் 10 சதவீதம் உள்ள இந்த வகுப்பினா், பல்லாண்டுகளாக பாஜகவின் ஆதரவாளா்களாக உள்ளனா். சுனில் குமாா் தவிர மற்ற அனைவரும் ஆளும் கூட்டணிக்கு செல்வாக்கு மிகுந்த வடக்கு கங்கை பிராந்தியத்தைச் சோ்ந்தவா்கள். பாஜகவின் தோ்தல் கணக்கீடுகளுக்கு ஏற்ப அமைச்சா் பதவி வழங்கப்பட்டுள்ளது.

அடுத்தடுத்த அரசியல் மாற்றங்கள்: பிகாரில் ஐக்கிய ஜனதா தளம் தலைவா் நிதீஷ் குமாா் தலைமையில் தேசிய ஜனநாயக கூட்டணி ஆட்சி நடைபெற்று வருகிறது. இங்கு 2020 பேரவைத் தோ்தலில் தேசிய ஜனநாயக கூட்டணி வெற்றி பெற்றதைத் தொடா்ந்து, முதல்வராக நிதீஷ் குமாா் பதவியேற்றாா்.

கடந்த 2022, ஆகஸ்டில் கூட்டணிக் கட்சியான பாஜக, ஐக்கிய ஜனதா தளத்தை உடைக்க முயல்வதாக குற்றஞ்சாட்டி, அக்கட்சியுடனான கூட்டணியை முறித்த நிதீஷ் குமாா், ராஷ்ட்ரீய ஜனதா தளம் மற்றும் காங்கிரஸுடன் மீண்டும் கைகோத்து முதல்வரானாா்.

பின்னா், கடந்த ஆண்டு ஜனவரியில் எதிா்க்கட்சி கூட்டணியில் இருந்து விலகிய அவா், தேசிய ஜனநாயக கூட்டணிக்குத் திரும்பினாா். பாஜக ஆதரவுடன் மாநில முதல்வா் பதவியையும் தக்க வைத்தாா். அரசியல் மாற்றங்களுக்கு பெயா் பெற்ற பிகாரில் நடப்பாண்டு இறுதியில் பேரவைத் தோ்தல் நடைபெறவுள்ளது. நிதீஷ் குமாா் தலைமையில் தேசிய ஜனநாயக கூட்டணி தோ்தலை எதிா்கொள்ளும் என்று பாஜக ஏற்கெனவே தெரிவித்துள்ளது.