ஆலங்காயம் அருகே பீமகுளம் பகுதியில் ஆடுகளை திருட முயன்ற 2 இளைஞா்களை பொதுமக்கள் மடக்கி பிடித்து போலீஸாரிடம் ஒப்படைத்தனா்.
ஆலங்காயம் அருகே பீமகுளம் பகுதியை சோ்ந்த விவசாயி சுந்தரம்(51). இவா் 25-க்கும் மேற்பட்ட ஆடுகளை தனது வீட்டருகே உள்ள கொட்டகையில் வளா்த்து வருகிறாா். இந்நிலையில், சனிக்கிழமை பைக்கில் வந்த 2 இளைஞா்கள் சுந்தரம் வளா்த்து வந்த 2 ஆடுகளை எடுத்துக் கொண்டு தப்பிக்க முயன்றனா். அப்போது தெருநாய்கள் குரைத்ததால் சந்தேகமடைந்த அக்கம்பக்கத்தினா் ஓடிவந்து பைக்கில் ஆடுகளை கடத்தி செல்ல முயன்ற 2 பேரையும் மடக்கிப் பிடித்து காவலூா் போலீஸாருக்கு தகவல் தெரிவித்தனா்.
தகவலறிந்து சம்பவ இடம் வந்த காவலூா் உதவி காவல்ஆய்வாளா் விஜய் மற்றும் போலீஸாா் பிடிப்பட்ட இருவரையும் காவல் நிலையம் அழைத்து வந்து விசாரணை மேற்கொண்டனா். விசாரணையில் திருவண்ணாமலை மாவட்டம், ஜமனாமரத்தூா் பகுதியை சோ்ந்த ஹரிசிவன்(20), சக்திவேல்(20) என்பதும், ஆடுகளை திருட முயன்றதும் தெரியவந்தது. இதனையடுத்து 2 பேரையும் கைது செய்து மேலும் தொடா் திருட்டு சம்பவங்களில் ஈடுப்பட்டு வந்துள்ளனரா என விசாரணை நடத்தி வருகின்றனா்.
