மகாராஷ்டிரா: உத்தவ் தாக்கரே மகன் வெற்றி; ராஜ் தாக்கரே மகன் தோல்வி... குடும்ப உறவில் மேலும் விரிசல்!

மாகிம் தொகுதியில் போட்டியிட்ட அமித் தாக்கரே

மகாராஷ்டிரா சட்டமன்றத்திற்கு கடந்த 20-ம் தேதி நடந்த தேர்தலில் பதிவான வாக்குகள் இன்று காலையில் எண்ணப்பட்டது. இத்தேர்தலில் மகாராஷ்டிரா நவநிர்மாண் சேனா தலைவர் ராஜ் தாக்கரே மகன் அமித் தாக்கரே மும்பையில் மாகிம் தொகுதியில் போட்டியிட்டார்.

மறைந்த சிவசேனா தலைவர் பால்தாக்கரேயின் சகோதரர் மகன் ராஜ் தாக்கரே ஆரம்பத்தில் சிவசேனாவில்தான் இருந்தார். ஆனால் உத்தவ் தாக்கரேயுடன் ஏற்பட்ட அதிகாரப்போட்டி காரணமாக கடந்த 2006-ம் ஆண்டு சிவசேனாவில் இருந்து விலகி மகாராஷ்டிரா நவநிர்மாண் சேனா என்ற புதிய கட்சியை தொடங்கினார். அதன் பிறகு உத்தவ் தாக்கரேயையும், ராஜ்தாக்கரேயையும் கூட்டணி சேர்க்க பலர் முயற்சி மேற்கொண்டனர். ஆனால் அந்த முயற்சி பலனலிக்கவில்லை. சிவசேனா இரண்டாக உடைந்த போது ராஜ் தாக்கரே பா.ஜ.கவிற்கு ஆதரவாக இருந்தார்.

பா.ஜ.க ஆதரவு

அதோடு சிவசேனாவை உடைத்த ஏக்நாத் ஷிண்டேயை ராஜ்தாக்கரே பல முறை சந்தித்து பேசினார். பா.ஜ.கவுடன் கூட்டணி அமைத்து சட்டமன்றத் தேர்தலில் போட்டியிட திட்டமிட்ட ராஜ்தாக்கரே அந்த முயற்சி பலனலிக்காமல் போனதால் தனித்து போட்டியிட்டார். இத்தேர்தலில் போட்டியிட ராஜ்தாக்கரே மகன் அமித் தாக்கரே போட்டியிட விருப்பம் தெரிவித்து வேட்பு மனுத்தாக்கல் செய்தார். உடனே அவருக்கு பா.ஜ.க முதல் ஆளாக ஆதரவு கொடுத்தது. ஆனால் அத்தொகுதியில் எம்.எல்.ஏ.வாக இருக்கும் சிவசேனா (ஷிண்டே) சதா சர்வான்கரிடம் போட்டியில் இருந்து விலகும்படி பா.ஜ.க கேட்டுக்கொண்டது. ஆனால் அக்கோரிக்கையை சதா சர்வான்கர் ஏற்றுக்கொள்ள மறுத்துவிட்டார்.

இதையடுத்து ராஜ்தாக்கரே மகன் துணிந்து தனித்து போட்டியிட்டார். இன்று ஓட்டு எண்ணத் தொடங்கிய போது ஆரம்பத்தில் இருந்தே அமித் தாக்கரே முன்னிலையில் இருந்தார். மாகிம் தொகுதியில் ராஜ்தாக்கரே மகன் படிப்படியாக பின்னுக்குத் தள்ளப்பட்டார். உத்தவ் தாக்கரே கட்சி சார்பாக போட்டியிட்ட மகேஷ் சாவந்த் இத்தேர்தலில் வெற்றி பெற்று இருக்கிறார். அமித் தாக்கரே இத்தேர்தலில் மூன்றாவது இடத்திற்கு தள்ளப்பட்டார். மகேஷ் சாவந்த் 1700 வாக்கு வித்தியாசத்தில் வெற்றி பெற்றார்.

இத்தேர்தல் மூலம் சிவசேனா பவன் இருக்கும் தாதர் பகுதி மீண்டும் உத்தவ் தாக்கரே கட்டுப்பாட்டில் வந்திருக்கிறது. இத்தேர்தலில் உத்தவ் தாக்கரே வேட்பாளரை நிறுத்தி ராஜ்தாக்கரேயின் மகன் வெற்றியை தடுத்து நிறுத்தி இருக்கிறார். இதனால் இரு குடும்பத்திற்கிடையேயான உறவில் மேலும் விரிசல் ஏற்பட்டு இருக்கிறது. அமித் தாக்கரே மட்டுமல்லாது அவரது மகாராஷ்டிரா நவநிர்மாண் சேனா ஒரு தொகுதியில் கூட முன்னிலை பெறவில்லை. அக்கட்சி மாநிலம் முழுவதும் 120 தொகுதியில் போட்டியிட்டது.

8 ஆயிரம் வாக்குகள் வித்தியாசத்தில் வெற்றி

இத்தேர்தலில் உத்தவ் தாக்கரே மகன் ஆதித்ய தாக்கரே ஒர்லி தொகுதியில் போட்டியிட்டார். அவரை எதிர்த்து முதல்வர் ஏக்நாத் ஷிண்டே தரப்பில் சிவசேனா சார்பாக ராஜ்ய சபை உறுப்பினர் மிலிந்த் தியோரா நிறுத்தப்பட்டார். அதோடு ராஜ்தாக்கரே கட்சி சார்பாக சந்தீப் தேஷ்பாண்டேயும் நிறுத்தப்பட்டு இருந்தார்.

இதனால் இத்தொகுதியில் கடும் போட்டி நிலவியது. ஆனாலும் இத்தொகுதியில் ராஜ்தாக்கரே போராடி வெற்றி பெற்று இருக்கிறார். ஆரம்பத்தில் இருந்தே மிலிந்த் தியோராவிற்கும் ஆதித்ய தாக்கரேயிக்கும் போட்டி கடுமையாக இருந்தது. இருவரும் அடிக்கடி முன்னிலை பெறுவதும், பின் தங்குவதுமாக இருந்தனர். ஆனால் இறுதியில் 8 ஆயிரம் வாக்குகள் வித்தியாசத்தில் ஆதித்ய தாக்கரே வெற்றி பெற்று தொகுதியை தக்கவைத்துக்கொண்டார். மும்பையில் உத்தவ் தாக்கரே இல்லம் இருக்கும் பாந்த்ரா கிழக்கு தொகுதியில் சிவசேனா(உத்தவ்) சார்பாக போட்டியிட்ட வருண் சர்தேசாய் முன்னிலையில் இருக்கிறது.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/ParthibanKanavuAudioBook