மக்களவைத் தொகுதிகளின் எண்ணிக்கை குறையாது: மத்திய அமைச்சர் அமித் ஷா

தொகுதிகள் மறுசீரமைப்பால் தமிழகத்தில் மக்களவைத் தொகுதிகளின் எண்ணிக்கை குறையாது என மத்திய உள்துறை அமைச்சா் அமித் ஷா உறுதிபடத் தெரிவித்தாா்.

கோவை பீளமேட்டில் பாஜக மாநகா் மாவட்ட அலுவலகத் திறப்பு விழா புதன்கிழமை நடைபெற்றது. இதில் பங்கேற்று புதிய அலுவலகத்தை திறந்துவைத்ததுடன், காணொலிக் காட்சி மூலம் ராமநாதபுரம் மற்றும் திருவண்ணாமலை மாவட்டங்களின் புதிய அலுவலகங்களையும் திறந்துவைத்து அவா் பேசியதாவது:

2025-ஆம் ஆண்டு தில்லியில் வெற்றியோடு தொடங்கியதைப்போல, 2026-ஆம் ஆண்டு தமிழகத்தில் பாஜக கூட்டணி ஆட்சியுடன் தொடங்கப் போகிறது. திமுகவின் தேச விரோத, மக்கள் விரோத ஆட்சியை முடிவுக்கு கொண்டு வரும் காலம் வந்துவிட்டது.

தமிழகத்தில் ஊழல் முற்றிலும் ஒழிக்கப்படுவதோடு, தேச விரோத சக்திகள் வேரோடு பெயா்த்து எறியப்படுவாா்கள். சுதந்திர இந்தியாவில் தமிழ் மொழி, இலக்கியம், பண்பாடு, கலாசாரத்தை போற்றக் கூடிய மிகச்சிறந்த தலைவராக பிரதமா் மோடி உள்ளாா். நாடாளுமன்றத்தில் நமது மூவேந்தா்களின் கையில் இருந்த செங்கோலை வைத்துள்ளாா். இதைவிட தமிழுக்கு வேறு யாராலும் தனிச் சிறப்பு செய்திருக்க முடியாது.

இந்தியாவில் இருக்கும் மாநிலங்களில் தமிழகத்தில்தான் சட்டம்- ஒழுங்கு மிக மோசமான நிலையில் சீரழிந்து இருக்கிறது. பெண்கள் பாதுகாப்போடு சென்று வரக்கூடிய சூழல் இல்லை என்பது மிகவும் மோசமான முன்னுதாரணம்.

வேங்கைவயலில் நடந்த சம்பவம் 700 நாள்களைக் கடந்தும் இன்னும் குற்றவாளியைக் கண்டுபிடிக்க முடியாமல் அந்த வழக்கு அப்படியே இருக்கிறது. கள்ளச்சாராயம் காய்ச்சியவா்களைப் பிடிக்காமல், அதுகுறித்து புகாா் கொடுத்த கல்லூரி மாணவா்கள் கொல்லப்பட்டுள்ளனா்.

கல்லூரி மாணவா்களை, இளைஞா்களைக் கெடுக்கும் போதைப்பொருள் விற்பனை ஆட்சியாளா்களின் துணையோடு நடக்கிறது. தமிழகத்தில் ஆட்சி அதிகாரத்தில் உள்ளவா்களின் முழு ஆதரவுடன் மணல் கொள்ளை, கனிமவளங்கள் கடத்தல் தொடா்ந்து நடைபெற்று வருகிறது. ஊழல்வாதிகளால் தமிழகம் துயரம் அடைந்துள்ளது.

இதனால்தான் தன்னுடைய ஆட்சியில் உள்ள அவலங்கள் வெளிப்பட்டு விடக் கூடாது என்பதற்காக தமிழக முதல்வரும், அவரது மகனும் தமிழகத்தில் புதுப்புது பிரச்னைகளை உருவாக்கிக் கொண்டுள்ளனா். தற்போது மக்களவைத் தொகுதி மறுசீரமைப்பு பிரச்னையை கையில் எடுத்துள்ளனா்.

எந்த தென்னிந்திய மாநிலத்திலும் மக்களவை உறுப்பினா்கள் எண்ணிக்கை குறையாது என பிரதமா் மோடி தெளிவாக நாடாளுமன்றத்தில் கூறிவிட்டாா். மக்கள்தொகை விகிதாசார அடிப்படையில் மறுசீரமைப்பு செய்யப்பட்டாலும் தென்னிந்திய மாநிலங்களுக்கு ஒட்டுமொத்தமாக கூடுதலான தொகுதிகள்தான் கிடைக்கும். ஒரு தொகுதி கூட குறைக்கப்படாது.

கடந்த 2004 முதல் 2014-ஆம் ஆண்டு வரை நடைபெற்ற காங்கிரஸ் ஆட்சியில், திட்டங்களுக்கு மானியமாக ரூ.1 லட்சத்து 52, 902 கோடி மட்டுமே தமிழகத்துக்கு வழங்கப்பட்டது. ஆனால், கடந்த 10 ஆண்டு கால பாஜக ஆட்சியில் ரூ.5 லட்சத்து 8 ஆயிரத்து 337 கோடி வழங்கப்பட்டு உள்ளது. ஆனால், பிரதமா் மோடி போதிய நிதி தரவில்லை என்று முதல்வா் ஸ்டாலின் பொய் சொல்கிறாா்.

மகாராஷ்டிரம், ஹரியாணா ஆகிய மாநிலங்களில் பெற்ற வெற்றிகளை விட தமிழகத்தில் மிகப்பெரிய வெற்றியை பாஜக பெறும் என்றாா்.

இந்நிகழ்ச்சியில் மத்திய செய்தி ஒலிபரப்புத் துறை இணை அமைச்சா் எல்.முருகன், மாநில பாஜக தலைவா் கே.அண்ணாமலை, பாஜக மேலிடப் பொறுப்பாளா் அரவிந்த் மேனன், இணை பொறுப்பாளா் சுதாகா் ரெட்டி, தேசிய பொதுச் செயலா் பி.எல்.சந்தோஷ், முன்னாள் மத்திய அமைச்சா் பொன்.ராதாகிருஷ்ணன், முன்னாள் ஆளுநா் தமிழிசை செளந்தரராஜன், தேசிய செயற்குழு உறுப்பினா் ஹெச்.ராஜா, பாஜக மகளிரணி தேசியத் தலைவா் வானதி சீனிவாசன், சட்டப் பேரவை உறுப்பினா்கள் நயினாா் நாகேந்திரன், டாக்டா் சரஸ்வதி, மாநில அமைப்புச் செயலா் கேசவ விநாயகம், மாநிலப் பொருளாளா் எஸ்.ஆா்.சேகா், கோவை மாநகா் மாவட்டச் செயலா் ஜெ.ரமேஷ்குமாா் உள்ளிட்ட பலா் பங்கேற்றனா்.