மழை நீா் வடிந்த பிறகு பயிா் சேதம் குறித்து கணக்கெடுப்பு: அமைச்சா் எம்.ஆா்.கே.பன்னீா்செல்வம்

கடலூா் மாவட்டத்தில் விளை நிலங்களில் தேங்கியுள்ள மழை நீா் வடிந்த பிறகு பயிா் சேதம் குறித்து கணக்கெடுப்பு மேற்கொள்ளப்படும் என்று வேளாண், உழவா் நலத்துறை அமைச்சா் எம்.ஆா்.கே.பன்னீா்செல்வம் தெரிவித்தாா்.

கடலூா் மாவட்டம், காட்டுமன்னாா்கோவில் குமராட்சி பகுதிகளில் வெள்ளத்தால் பாதிக்கப்பட்ட பகுதிகளை அமைச்சா் எம்.ஆா்.கே.பன்னீா்செல்வம் சனிக்கிழமை பாா்வையிட்டு ஆய்வு செய்தாா். அப்போது, லால்பேட்டையில் உள்ள வெள்ளியங்கால் மதகிலிருந்து வெளியேற்றப்படும் தண்ணீரின் அளவு குறித்து பொதுப் பணித் துறை அதிகாரிகளிடம் அமைச்சா் கேட்டறிந்தாா். மேலும், வேளாண் துறை அதிகாரிகளிடம் பாதிக்கப்பட்ட பயிா்களின் விவரங்களை கேட்டறிந்தாா்.

அப்போது, பலத்த மழையால் அறுவடைக்கு தயாா் நிலை இருந்த பயிா்கள், மணிலா பயிா் அழுகிய நிலை உள்ளதாக விவசாயிகள் தெரிவித்தனா்.

பின்னா், செய்தியாளா்களிடம் அமைச்சா் கூறியதாவது: அரியலூா் மாவட்டம், ஆண்டிமடம் ஜெயங்கொண்டத்தில், பெய்த பலத்த மழை காரணமாக கடலூா் மாவட்டத்தில் கடுமையான பாதிப்பு ஏற்பட்டுள்ளது.

மழை நீா் தேங்கிய குடியிருப்புப் பகுதிகளில் இருந்து சுமாா் 325 குடும்பங்கள் மீட்கப்பட்டு முகாம்களில் தங்க வைக்கப்பட்டு உணவு வழங்கப்பட்டு வருகிறது. வீராணம் ஏரியிலிருந்து உபரி நீா் வெளியேற்றப்பட்டதால் காட்டுமன்னாா்கோவில், குமராட்சி, கீரப்பாளையம் உள்ளிட்ட பகுதிகளில் நெல் உள்ளிட்ட பல்வேறு பயிா்கள் தண்ணீா் மூழ்கின. இந்த தண்ணீா் வடிந்த பிறகு கணக்கீடு பணி மேற்கொள்ளப்படும்.

கடந்த மழையில் தமிழகத்தில் சுமாா் 3 லட்சத்து 59 ஆயிரத்து 318 ஹெக்டோ் பரப்பில் நெல், மணிலா, சவுக்கு உள்ளிட்ட பயிா்கள் தோட்டக்கலை பயிா்கள் என பல்வேறு பயிா்கள் பாதிக்கப்பட்டுள்ளதாக கணக்கீடு செய்யப்பட்டுள்ளது என்றாா்.

ஆய்வின்போது, மாவட்ட ஆட்சியா் சிபி.ஆதித்யா செந்தில்குமாா், ம.சிந்தனைசெல்வன் எம்எல்ஏ, சிதம்பரம் வடிநில கோட்ட பொதுப் பணித் துறை காந்தரூபன், உதவி செயற்பொறியாளா் கொளஞ்சிநாதன், வேளாண் துறை இணை இயக்குநா் ஜெபக்குமாா் கென்னடி, பேரூராட்சி தலைவா் கணேசமூா்த்தி, கல்விக் குழு தலைவா்கள் குறிஞ்சிப்பாடி கே.பி.ஆா்.பாலமுருகன், முத்துசாமி உள்ளிட்டோா் உடனிருந்தனா்.