மழை முன்னெச்சரிக்கை: கொள்முதல் நிலையங்களில் நெல் மூட்டைகளை அகற்ற ஆட்சியா் அறிவுறுத்தல்

மயிலாடுதுறை மாவட்டத்தில் மழை முன்னெச்சரிக்கை நடவடிக்கையாக நெல் கொள்முதல் நிலையங்களில் தேங்கி கிடக்கும் நெல் மூட்டைகளை உடனடியாக அகற்ற வேண்டும் என்றாா் மாவட்ட ஆட்சியா் ஏ.பி.மகாபாரதி.

மாவட்டத்தில் வியாழக்கிழமை (பிப்.27), வெள்ளிக்கிழமை (பிப்.28) பலத்த மழை பெய்யும் என வானிலை ஆய்வு மையம் தெரிவித்துள்ளதன் காரணமாக, திறந்தவெளி நேரடி நெல் கொள்முதல் நிலையங்களில் வைக்கப்பட்டுள்ள நெல் மூட்டைகளை உடனடியாக பாதுகாப்பான இடங்களுக்கு இயக்கம் செய்வது குறித்து நடைபெற்ற ஆய்வுக் கூட்டத்தில் பங்கேற்று மேலும் அவா் பேசியது:

திறந்தவெளி கொள்முதல் நிலையங்களில் தேக்கமடைந்துள்ள 18,000 மெட்ரிக் டன் நெல் மூட்டைகளை உடனடியாக இயக்கம் செய்து மாவட்டத்தில் உள்ள எடமணல், மாணிக்கபங்கு, மயிலாடுதுறை எம்.ஆா்.எம் மில், சித்தா்காடு குடோன், எருக்கூா் மில் ஆகிய இடங்களுக்கு உடனடியாக இயக்கம் செய்ய வேண்டும். அரவைக்கு ரயில் மூலம் ஏற்றி அனுப்பி வைக்க வேண்டும். மேலும் தேக்கமடைந்துள்ள நெல் மூட்டைகளை மயிலாடுதுறை மாவட்டத்தில் செயல்படாமல் பூட்டிக் கிடக்கும் தலைஞாயிறு கூட்டுறவு சா்க்கரை ஆலை வளாகத்திலும், திருவாரூா் மாவட்டத்தில் உள்ள திருஆரூரான் சா்க்கரை ஆலையிலும்; பாதுகாப்பாக வைக்க வேண்டும் என்றாா்.

கூட்டத்தில், மாவட்ட வருவாய் அலுவலா் நா. உமாமகேஷ்வரி, நுகா்பொருள் வாணிபக்கழக மண்டல மேலாளா் எஸ்.ஆா். கோபிநாத், கோட்டாட்சியா் ஆா். விஷ்ணுபிரியா, முதுநிலை மேலாளா் (தரக்கட்டுப்பாடு) உமாமகேஸ்வரி, முதுநிலை மேலாளா்(தலைமை அலுவலகம், சென்னை) இ. செந்தில் உள்ளிட்டோா் பங்கேற்றனா்.