மழைக் காலத்தில் அலுவலா்கள் ஒருங்கிணைந்து செயல்பட வேண்டும் -கடலூா் ஆட்சியா் அறிவுறுத்தல்

மழைக் காலத்தில் துறை அலுவலா்கள் ஒருங்கிணைந்து செயல்பட வேண்டும் என்று கடலூா் மாவட்ட ஆட்சியா் சிபி ஆதித்யா செந்தில்குமாா் தெரிவித்தாா்.

வங்கக் கடலில் உருவான காற்றழுத்த தாழ்வு மண்டலம் காரணமாக கடலூா் மாவட்டத்தில் பல்வேறு இடங்களில் பரவலாக மழை பெய்தது. கடலூா் மாநகரப் பகுதியில் கடந்த இரண்டு நாள்களுக்கு முன்பு பெய்த பலத்த மழை காரணமாக மாநகரத்துக்குள்பட்ட தாழ்வான பகுதிகளான ஏணிக்காரன் தோட்டம், நவநீதம் நகா் மற்றும் புருஷோத்தம்மன் நகா் ஆகிய பகுதிகளில் மழைநீா் தேங்கியது.

மாநகராட்சியின் மூலம் தேங்கிய மழை நீரை மோட்டாா்கள் மூலம் வெளியேற்றும் பணிகள் தொடா்ந்து நடைபெற்று வருகிறது. ஏணிக்காரன் தோட்டத்தில் அங்கன்வாடி மையம் அருகே தேங்கியிருந்த மழை நீரை மோட்டாா் மூலம் அகற்றி, குழந்தைகள் மையத்துக்கு பாதுகாப்பாக செல்ல தற்காலிக பாதை அமைக்கப்பட்டது. நவநீதம் நகா், புருஷோத்தம்மன் நகா் மற்றும் ஏணிக்காரன் தோட்டம் ஆகிய பகுதிகளில் நீா் தேங்கும் குட்டை உள்ளது. இங்கு, மழைநீா் வடிகால்வாய் சிறியதாக அமைக்கப்பட்டதால் மழைநீா் முழுவதுமாக வெளியேறுவதில் தடை ஏற்பட்டது.

இதையடுத்து, அந்தப் பகுதியில் மழை நீா் எளிதில் வடிந்து செல்லும் வகையில் வடிகால்வாய் அமைக்கவும், அதற்கான மதிப்பீடு தயாா் செய்யவும் ஆட்சியா் அறிவுறுத்தினாா்.

மாநகராட்சிப் பகுதிகளில் மழைநீா் தேங்கும் இடங்களை தொடா்ந்து கண்காணித்து, கொசு உற்பத்தி ஆகாமல் தடுத்திட மழைநீரை விரைவாக அகற்றவும், குறிப்பாக குடியிருப்புப் பகுதிகளில் கூடுதல் கவனம் செலுத்தி பாதுகாப்பு நடவடிக்கைகள் மேற்கொள்ள மாநகராட்சி ஆணையரிடம் அறிவுறுத்தினாா்.

தொடா்ந்து, அங்கன்வாடி மையத்தில் கல்வி பயிலும் குழந்தைகளின் வருகை, அவா்களுக்கு கல்வி கற்பிக்கப்படும் முறைகள், ஊட்டச்சத்து சாா்ந்த கணக்கெடுப்புகள் குறித்து ஆய்வு செய்து, குழந்தைகளின் வயதுக்கேற்ற எடை மற்றும் உயரம் உள்ளதா? என சோதித்து பாா்த்தாா்.

மேலும், குழந்தைகளுக்கு வழங்கப்படும் உணவை தரமாகவும், சுகாதாரமாகவும் சமைக்க வேண்டும். மையத்தை தூய்மையாகவும், சுகாதாரமாகவும் பராமரிக்க வேண்டும். மழைக் காலத்தில் துறை அலுவலா்கள் ஒருங்கிணைந்து விரைந்து செயல்படுமாறு அறிவுறுத்தினாா்.

ஆய்வின்போது, கடலூா் மாநகராட்சி மேயா் சுந்தரி, மாநகராட்சி ஆணையா் எஸ்.அணு, கடலூா் வருவாய்க் கோட்டாட்சியா் அபிநயா, உள்ளாட்சி அமைப்புகளின் பிரதிநிதிகள் மற்றும் அரசு அலுவலா்கள் உடனிருந்தனா்.