மாநில நீச்சல் போட்டிக்கு தகுதி: மாணவா்களுக்கு பாராட்டு

அரியலூரில் நடைபெற்ற நீச்சல் போட்டியில் வெற்றிப் பெற்று மாநில போட்டிக்கு தகுதிப் பெற்ற சிறுவளூா் அரசுப் பள்ளி மாணவா்களுக்கு வெள்ளிக்கிழமை பரிசுகள் வழங்கி பாராட்டு தெரிவிக்கப்பட்டது.

அரியலூா் மாவட்டத்தில், நிகழ் கல்வியாண்டில் குடியரசு தின, பாரதியாா் தின, புதிய விளையாட்டுப் போட்டிகள் மாவட்ட அளவில் நடைபெற்று வருகிறது.

இதில் கோல்டன் கேட்ஸ் பள்ளியில் நடைபெற்ற 14 வயதுக்குட்பட்டோருக்கான நீச்சல் போட்டியில், 50 மீட்டா் மற்றும் 100 மீட்டா் பிரிவில் சிறுவளூா் அரசு உயா்நிலைப் பள்ளி 9 ஆம் வகுப்பு மாணவா்கள் உன்னிகிருஷ்ணன் சஞ்சீவ், 8 ஆம் வகுப்பு மாணவா்கள் யோகேஸ்வரன் பகலவன் ஆகியோா் வெற்றி பெற்று, மாநில அளவிலான போட்டிக்கு தகுதிப் பெற்றனா்.

இதையடுத்து, நீச்சல் போட்டியில் வெற்றி பெற்ற மாணவா்களுக்கு அப்பள்ளி தலைமை ஆசிரியா் சின்னதுரை வெள்ளிக்கிழமை பரிசுகளை வழங்கி பாராட்டு தெரிவித்தாா்.

நிகழ்வில் பயிற்சி அளித்த உடற்கல்வி ஆசிரியா் அந்தோணிசாமி மற்றும் ஆசிரியா்கள் செந்தமிழ்ச்செல்வி தனலட்சுமி, வெங்கடேசன், அபிராமி பாலமுருகன் ஆகியோா் உடனிருந்தனா்.