மாமல்லபுரம் புராதன சின்னங்கள் பகுதிகளில் சட்டையில் கேமராவுடன் போலீஸாா் ரோந்து

மாமல்லபுரம் புராதன சின்னங்கள் உள்ள பகுதிகளில் சமூக விரோதிகளை அடையாளம் காண சட்டையில் பாடி கேமராவுடன் மாமல்லபுரம் போலீஸாா் ரோந்து பணி தொடங்கியது.

இதன்மூலம் புராதன சின்னங்களுக்கு சுற்றுலாப் பயணிகள் போ்வையில் வரும் சமூக விரோதிகளை புகைப்படம், விடியோ எடுத்து அடையாளம் காட்ட உதவும் என எதிா்பாா்க்கப்படுகிறது.

மாமல்லபுரம் புராதன சின்னங்கள் உள்ள முக்கிய பகுதிகளில் பெண்களை கிண்டல் செய்பவா்கள், வழிப்பறி திருடா்கள் இனி போலீஸ் கண்காணிப்பில் இருந்து தப்ப முடியாது. கடற்கரைக் கோயில், வெண்ணெய் உருண்டை பாறை, கடற்கரைப் பகுதிகள் என முக்கிய இடங்களில் சட்டையில் பாடி கேமராவுடன் மாமல்லபுரம் போலீஸாா் ரோந்து பணி தொடங்கியுள்ளனா்.

சுற்றுலாப் பயணிகள் போா்வையில் வரும் சமூக விரோதிகள் புராதன சின்னங்களில் சுற்றிப் பாா்க்க வரும் சுற்றுலாப் பயணிகளின் செல்போன், உடைமைகளைத் திருடுவது, பெண்களைக் கிண்டல் செய்வது, மதுபோதையில் தொல்லியல் துறை பணியாளா்களிடம் தகராறில் ஈடுபடுவது உள்ளிட்ட செயல்களில் ஈடுபடுகின்றனா்.

இவா்களின் நடமாட்டத்தைக் கண்டறிய இந்த சட்டை பாடி கேமரா உதவும். 10 மீ. தூரம் துள்ளியமாக விடியோ எடுக்கும் அதிநவீன கேமிரா சட்டையில் பொறுத்திக் கொண்டு 8 போலீஸாா் கடற்கரைக் கோயில், வெண்ணெய் உருண்டை பாறை, ஐந்து ரதம், அா்ச்சுனன் தபசு போன்ற புராதன சின்னங்களில் ரோந்து வருவா்.

ஞாயிற்றுக்கிழமை கடற்கரைக் கோயில் வளாகம், பேருந்து நிலையம் பகுதியில் சட்டையில் கேமரா அணிந்து ரோந்து பணியில் ஈடுபட்ட போலீஸாரின் பணிகளை மாமல்லபுரம் காவல் துணைக் கண்காணிப்பாளா் ரவி அபிராம் உத்தரவின் பேரில், மாமல்லபுரம் காவல் ஆய்வாளா் பாலமுருகன் பாா்வையிட்டு பல்வேறு ஆலோசனைகளை வழங்கினாா்.