மோசடியாளா்களுக்கு வங்கிக் கடன் அளிப்பதை அரசு நிறுத்த வேண்டும்- ராகுல் வலியுறுத்தல்

பொதுத் துறை வங்கிகளின் பணத்தை கடன் என்ற பெயரில் தங்களுடைய மோசடி நண்பா்களுக்கு வாரி வழங்குவதை மத்திய அரசு நிறுத்த வேண்டும் என்று மக்களவை எதிா்க்கட்சித் தலைவா் ராகுல் காந்தி வலியுறுத்தியுள்ளாா்.

அகில இந்திய வங்கி அதிகாரிகள் கூட்டமைப்பின் பிரதிநிதிகள், ராகுல் காந்தியை தில்லியில் புதன்கிழமை சந்தித்துப் பேசினா். அப்போது, அவா்கள் கூறிய குறைகளை ராகுல் கேட்டறிந்தாா். பின்னா் அவா் ‘எக்ஸ்’ வலைதளத்தில் வெளியிட்ட பதிவில், ‘பொதுத்துறை வங்கிகள் மக்களுக்கு சேவையாற்ற முன்னுரிமை அளிக்க வேண்டும். ஆனால், இப்போது லாபத்துக்கு முன்னுரிமை அளிக்க கட்டாயப்படுத்தப்படுகிறாா்கள். இதனால் மக்களுக்கு சிறப்பான சேவையை அளிக்க முடியாமல் போகிறது.

வங்கிகளில் ஊழியா் பற்றாக்குறை நிலவுவது பணிச்சூழலை மோசமாக்குகிறது. பெண் ஊழியா்களுக்கு சமமான வாய்ப்புகள் அளிக்கப்படுவதில்லை.

பொதுத் துறை வங்கிகளின் பணத்தை தங்களுடைய மோசடி நண்பா்களுக்கு கடன் என்ற பெயரில் வாரி வழங்குவதை பிரதமா் நரேந்திர மோடி தலைமையிலான மத்திய அரசு நிறுத்த வேண்டும்’ என்று கூறியுள்ளாா்.