வயநாடு தொகுதியில் வெற்றி பெறும் பிரியங்கா ராகுலை தோற்கடிப்பாரா?
கேரள மாநிலம் வயநாடு மக்களவைத் தொகுதிக்கான இடைத் தேர்தலில், காங்கிரஸ் வேட்பாளர் பிரியங்கா காந்தி 3.64 லட்சம் வாக்கு வித்தியாசத்தில் முன்னிலையில் உள்ளார்.
அவரது வெற்றி உறுதி செய்யப்பட்டிருக்கும் நிலையில், எத்தனை வாக்கு வித்தியாசத்தில் வெற்றி என்பது மட்டுமே இன்னமும் எதிர்பார்க்கப்படும் விஷயமாக உள்ளது.
பிரியங்கா காந்தி சில ஆண்டு காலமாக அரசியலில் ஈடுபட்டு வந்தாலும், முதல் முறையாக வயநாடு மக்களவைத் தொகுதியில்தான் தீவிர அரசியல் எனப்படும் தேர்தலில் களம்கண்டுள்ளார்.
முதல்முறையாக தேர்தலில் போட்டியிட்ட பிரியங்கா, வரலாற்றுச் சாதனையாக மிகப்பெரிய வாக்கு வித்தியாசத்தில் தனது வெற்றியைப் பதிவு செய்யவிருக்கிறார்.
2024 மக்களவைத் தேர்தலில், வயநாடு தொகுதியில் போட்டியிட்ட மக்களவை எதிர்க்கட்சித் தலைவர் ராகுல் காந்தி, 6.47 லட்சம் வாக்குகளைப் பெற்றிருந்தார். அது மட்டுமல்லாமல் 3.64 லட்சம் வாக்கு வித்தியாசத்தில் தனது வெற்றியை வயநாடு தொகுதியில் பதிவு செய்திருந்தார்.
தற்போது நடைபெற்ற இடைத்தேர்தலில் வயநாடு தொகுதியில் வென்றிருக்கும் பிரியங்கா காந்தி, மற்ற வேட்பாளர்களை தோற்கடித்துவிட்டது உறுதியான நிலையில், இதற்கு முன்பு மகத்தான வெற்றியைப் பதிவு செய்திருக்கும் ராகுலின் சாதனையை முறியடிப்பாரா என்ற கேள்வி எழுந்துள்ளது.
பிரியங்கா காந்தி 6.17 லட்சம் வாக்குகள் பெற்று முன்னிலையில் உள்ளார். வாக்குகளில் இன்னமும் ராகுலை முந்தவில்லை என்றாலும்கூட, வாக்கு வித்தியாசத்தில், ஏற்கனவே ராகுலின் வெற்றி வித்தியாசத்தை முறியடித்துவிட்டார். தற்போது இந்திய கம்யூ. வேட்பாளர் சத்யன் மொகேரியை விட, பிரியங்கா 4 லட்சம் வாக்குகள் அதிகம் பெற்று முன்னிலையில் உள்ளார் என்பது குறிப்பிடத்தக்கது.
கேரள மாநிலத்தில் மொத்தமுள்ள 9.52 லட்சம் வாக்குகளில், பிரியங்கா காந்தி ஏற்கனவே 6 லட்சம் வாக்குகளைப் பெற்றுவிட்டார் என்பது குறிப்பிடத்தக்கது.
