வரதராஜபுரத்தில் வெள்ளப் பாதிப்பை தடுக்க நடவடிக்கை எடுக்கக் கோரிக்கை

தாம்பரம் அருகேயுள்ள வரதராஜபுரம் மற்றும் எருமையூரில் வெள்ளப் பாதிப்பை தடுக்க அரசு நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனா்.

இது குறித்து வரதராஜபுரம் குடியிருப்போா் நலச் சங்கத்தினா் சென்னையில் செய்தியாளா்களிடம் கூறியதாவது:

தாம்பரத்திலிருந்து 4 கி.மீ. தொலைவுக்குள் வரதராஜபுரம், எருமையூா் ஆகிய இரு கிராமங்கள் உள்ளன. வெளிவட்டச்சாலை பகுதி மற்றும் அடையாறு ஆற்றின் மேற்குப் பகுதியில் அமைந்துள்ள இந்த கிராமங்களில் வசிக்கும் மக்கள், ஒவ்வோா் ஆண்டும் மழைக்காலத்தின் போது, ஏற்படும் வெள்ள பாதிப்பால் கடும் சிரமத்தைச் சந்தித்து வருகின்றனா்.

குறிப்பாக, கிஷ்கிந்தா - தாம்பரம் சாலையில் இதுவரை மழைநீா் வடிகால்கள் அமைக்கப்படாததால் மழைநீா் முறையாக வெளியேற வழி இல்லாமல் குடியிருப்புப் பகுதிகளை சூழ்ந்து பல நாள்களுக்கு நீா் வடியாத நிலை ஏற்படுகிறது.

மேலும், குடியிருப்புப் பகுதிகளையொட்டி தாழ்வான பகுதிகளில் புதிதாக 96 ஏக்கா் நிலப்பரப்பில் ஒரு குடியிருப்பு மனைப்பிரிவு உருவாக்கப்பட்டு வருகிறது. இதற்காக தரைமட்டத்தை 7 முதல் 12 அடிவரை உயா்த்த பெருமளவில் மண் கொட்டப்பட்டு வருவதால், இயற்கையாக தண்ணீா் வடியும் வாய்க்கால்கள் மூடப்படுகின்றன. இதனால், மழைநீா் வடிய வழியில்லாமல் குடியிருப்புப் பகுதிகளில் புகுந்து கடும் சிரமத்தை எதிா்கொள்ளும் சூழல் உருவாகியுள்ளது.

இது தொடா்பாக, அதிகாரிகளுக்கு பலமுறை புகாா் அளித்தும் எந்த நடவடிக்கையும் எடுக்கப்படவில்லை. எனவே, முதல்வா் இதில் தலையிட்டு இந்த கிராமங்களில் மழைநீா் புகாத வகையில் நடவடிக்கை எடுக்க வேண்டும் என்றனா்.

இந்த சந்திப்பின் போது வரதராஜபுரம் நலச் சங்கத்தை சோ்ந்த பங்குத் தந்தை லியோ டோமினிக், ஜோஸ் பூனுஸ், மோகன், கிருஷ்ணமூா்த்தி உள்ளிட்டோா் உடனிருந்தனா்.