வேலூரில் வரத்து குறைவால் மீன்கள் விலை உயா்வு

வேலூா் மீன் மாா்க்கெட்டில் ஞாயிற்றுக்கிழமை மீன்கள் வரத்து குறைவால் விலை அதிகரித்து காணப்பட்டது.

வேலூா் புதிய மீன் மாா்க்கெட்டில் நள்ளிரவு 2 மணிக்கு மேல் மீன் மொத்த வியாபாரமும், காலை 6 மணிக்கு மேல் சில்லறை வியாபாரமும் நடைபெறுகிறது. திங்கள் முதல் சனிக்கிழமை வரை நாள் ஒன்றுக்கு 50 டன் வரை மீன்கள் விற்பனை செய்யப்படுகின்றன. ஞாயிற்றுக் கிழமையில் மட்டும் 50 முதல் 70 டன் மீன்கள் விற்பனை செய்யப்படுகின்றன.

இந்நிலையில், ஞாயிற்றுக்கிழமை வரத்துக் குறைவால் வேலூரில் மீன்கள் விலை அதிகரித்திருந்தது. அதன்படி, வஞ்சிரம் பீஸ் கிலோ ரூ.1,200, முழு வஞ்சிரம் ரூ.1,000, சின்ன வஞ்சிரம் கிலோ ரூ.400 முதல் ரூ.500 வரையும் , கருப்பு வவ்வா ரூ.600 , வெள்ளை வவ்வா ரூ.800, நண்டு ரூ.300, இறால் ரூ.250 முதல் அளவுக்கு ஏற்ப விற்பனை செய்யப்படுகிறது என வியாபாரிகள் தெரிவித்தனா்.