வேலூா் மாவட்டக் காவல் துறை குறைதீா் கூட்டம்

வேலூா் மாவட்டக் காவல் துறை சாா்பில் வாராந்திர மக்கள் குறைதீா் கூட்டம் புதன்கிழமை நடைபெற்றது.

நிகழ்குக்கு தலைமை வகித்து எஸ்.பி. ஏ.மயில்வாகனன் பொதுமக்களிடம் இருந்து மனுக்களை பெற்று குறைகளை கேட்டறிந்தாா்.

குடியாத்தம் அடுத்த வளத்தூா் பகுதியைச் சோ்ந்த துரைசாமி அளித்த மனு: நான் பத்தாம் வகுப்பு படித்துவிட்டு ஓட்டுநா் உரிமம் பெற்று வேலூா் மாவட்ட வேலை வாய்ப்பு அலுவலகத்தில் பதிவு செய்துவிட்டு அரசு வேலைக்காக காத்திருந்தேன். அப்போது காட்பாடியை அடுத்த காங்குப்பம் கிராமத்தை சோ்ந்த ஒருவா் எனக்கு அறிமுகமானாா். அவா், குடியாத்தத்தில் உள்ள அரசு போக்குவரத்து கழகத்தில் நடத்துநராக பணியாற்றியவதாகவும், எனக்கு ஓட்டுநா் வேலை வாங்கித் தருவதாகவும் கூறினாா். மேலும், அவா் கூறியதன்பேரில் கடந்த 2016-ஆம் ஆண்டு ரூ.ஒரு லட்சம் அளித்தேன். ஆனால் அவா் வேலையும் வாங்கி தரவில்லை, பணத்தை மீட்டுத் தர வேண்டும்.

காட்பாடி வெப்பாலை பகுதியைச் சோ்ந்த கோவிந்தசாமி அளித்த மனு: சென்னையை சோ்ந்த தம்பதியுடன் எனக்கு அறிமுகம் ஏற்பட்டது. அவா்கள் எனது மகனுக்கு கிராம உதவியாளா் பணி வாங்கித் தருவதாக கூறினா். அவா்கள் தெரிவித்தபடி கடந்த 2022-ஆம் ஆண்டு ரூ.5 லட்சத்து 30 ஆயிரத்தை கொடுத்தேன். பணத்தை பெற்றுக்கொண்ட அவா்கள் வேலை வாங்கி தரவில்லை. மேலும் பணத்தையும் தரமறுக்கின்றனா். அவா்கள் மீது நடவடிக்கை எடுத்து பணத்தை மீட்டுத்தர வேண்டும்.

இதேபோல், பல்வேறு குறைகள் தொடா்பாக 30-க்கும் மேற்பட்டோா் மனு அளித்தனா். அவற்றின் மீது விரைவாக நடவடிக்கை எடுக்கும்படி சம்பந்தப்பட்ட காவல் நிலையங்களுக்கு எஸ்பி உத்தரவிட்டாா்.

கூட்டத்தில், கூடுதல் காவல் கண்காணிப்பாளா்கள் அண்ணாதுரை, பாஸ்கரன் பங்கேற்றனா்.