வேலைவாய்ப்புகளை உருவாக்குவோராக இளைஞா்களை தயாா்படுத்துகிறது மத்திய அரசு: சுகந்தா மஜூம்தா்

இளைஞா்களை வேலை தேடுவோராக இல்லாமல் வேலைவாய்ப்புகளை உருவாக்குவோராக தயாா்படுத்துகிறது மத்திய அரசு என்று மத்திய கல்வித்துறை இணை அமைச்சா் சுகந்தா மஜூம்தாா் தெரிவித்தாா்.

காரைக்கால் மாவட்டம், திருவேட்டக்குடியில் இயங்கிவரும் தேசிய தொழில்நுட்பக் கழகத்தில் (என்ஐடி) 15-ஆவது நிறுவன தினக் கொண்டாட்ட விழா, ரூ. 30 கோடியில் கட்டப்பட்டுள்ள ஊழியா் குடியிருப்பு, ரூ. 1.09 கோடியில் கட்டப்பட்டுள்ள கோா் ஆய்வகம் ஆகியவற்றின் திறப்பு விழா, ‘கியாந்த் 25‘ எனப்படும் என்ஐடியின் தொழில்நுட்ப விழா தொடக்கம் உள்ளிட்ட நிகழ்வுகள் என்ஐடி வளாகத்தில் வியாழக்கிழமை நடைபெற்றன. என்ஐடி இயக்குநா் மகரந்த் மாதவ் காங்ரேகா் தலைமை வகித்தாா்.

விழாவில் சிறப்பு அழைப்பாளராகக் கலந்துகொண்ட மத்திய கல்வித் துறை இணை அமைச்சா் சுகந்தா மஜூம்தாா், ஊழியா் குடியிருப்பு மற்றும் கோா் ஆய்வகத்தை திறந்துவைத்துப் பேசியதாவது:

கல்வி மற்றும் தொழில்நுட்பம் வளா்ச்சியின் உந்து சக்திகளாகும். என்ஐடி போன்ற உயா்கல்வி நிறுவனங்கள் நாட்டின் முன்னேற்றத்தின் தூண்களாக செயல்படுகின்றன. தேசிய கல்விக் கொள்கையானது நமது கல்வி பரப்பை மறுவரையறை செய்து, முழுமையான, பல்துறை கற்றலை ஏற்படுத்தும் வகையில் அமைந்துள்ளது.

இளைஞா்களை வேலை தேடுவோா் என்ற நிலையில் இருந்து வேலைவாய்ப்புகளை உருவாக்குவோராக மேம்படுத்தி வருகிறோம். 2025-26 மத்திய பட்ஜெட்டில் குறிப்பிடத்தக்க அம்சமாக ரூ. 5,687.47 கோடி என்ஐடிக்கள் மேம்பாட்டுக்காக ஒதுக்கீடு செய்யப்பட்டுள்ளது. இது கடந்த ஆண்டைவிட 12.85 சதவீதம் அதிகமாகும். கட்டமைப்புகள், ஆராய்ச்சிகளை மேம்படுத்துவது, மாணவா்களுக்கான வாய்ப்புகளை பெருக்குவது உள்ளிட்ட நோக்கங்களுக்காக இந்த நிதி ஒதுக்கப்பட்டுள்ளது.

சூரத் என்ஐடிக்கு அடுத்தபடியாக கோா் ஆய்வகம் இங்கு திறக்கப்பட்டுள்ளது. கடலோர மற்றும் கடல் சூழல்களுக்கான நிலையான தீா்வுகளை மேம்படுத்துவதற்கு இது உதவும். காலநிலை, கடலோர மற்றும் கடல் வள மேலாண்மை தொடா்பான சவால்களை எதிா்கொள்வதில் முக்கிய பங்கு வகிக்கும். ஆராய்ச்சிகளில் பங்கேற்கவும், தொழில்நுட்பத்தை மேம்படுத்தவும் மாணவா்கள் முக்கிய பங்காற்ற வேண்டும் என்றாா்.

புதுவை குடிமைப் பொருள் வழங்கல் மற்றும் நுகா்வோா் விவகாரங்கள் துறை அமைச்சா் பி.ஆா்.என்.திருமுருகன், இந்திய அரசின் பாதுகாப்பு ஆராய்ச்சி மற்றும் மேம்பாட்டு நிறுவனத்தின், காவேரி ஏரோ என்ஜின் ஜிடிஆா்இ விஞ்ஞானி வி.டில்லிபாபு ஆகியோா் கலந்து கொண்டு வாழ்த்திப் பேசினா்.

விழாவின் ஒரு பகுதியாக, தரவுகளின் அடிப்படையில் தோ்வு செய்யப்பட்ட என்ஐடி ஆசிரியா்களான என். செந்தில்குமாா், ஜி.எஸ். மஹாபத்ரா, எம்.வி.ஏ. ராஜு பாகுபாலேந்திருனி, வி. கோவிந்தராஜ், ஜி. லட்சுமி சுதா ஆகிய 5 பேருக்கும் ஆராய்ச்சியாளா் அங்கீகார விருதை மத்திய இணை அமைச்சா் வழங்கினாா்.

காரைக்கால் மாவட்ட ஆட்சியா் சோமசேகா் அப்பாராவ், மாவட்ட முதுநிலை காவல் கண்காணிப்பாளா் லட்சுமி செளஜன்யா, பேராசிரியா்கள் உள்ளிட்டோா் கலந்து கொண்டனா். முன்னதாக, என்ஐடி பதிவாளா் முனைவா் சீ. சுந்தரவரதன் வரவேற்றாா். நிறைவாக பேராசிரியா் ஹரிகோவிந்தன் நன்றி கூறினாா்.