96 Re-release: "இது ஸ்கூல், காலேஜ் முடிச்சிருக்கலாமேனு ஏக்கத்தை உருவாக்குச்சு!" - முருகதாஸ் பேட்டி

எந்த நிலப்பரப்பை மையப்படுத்திய கதை என்றாலும், அதில் குணச்சித்திர நடிகராகத் தன்னுடைய இருப்பைப் பதிவு செய்துவிடுவார் நடிகர் 'ஆடுகளம்' முருகதாஸ்.

விஜய் சேதுபதியின் '96' படத்திற்கெனத் தனி ரசிகர் கூட்டம் எப்போதும் உண்டு. ஒவ்வொரு முறை ரீ-ரிலீஸின்போதும், படத்தையும் அதன் பாடல்களையும் ரசிகர்கள் உருகிக் கொண்டாடுவார்கள்.

கடந்த வெள்ளிக்கிழமை இப்படம் ரீ-ரிலீஸ் செய்யப்பட்டது. '96' ரீ-ரிலீஸ் ஆகியிருக்கும் சமயத்தில், அப்பட நினைவுகள் குறித்து நடிகர் 'ஆடுகளம்' முருகதாஸிடம் பேசினோம்.

நம்மிடையே பேசியவர், " '96’ திரைப்படத்தை வருஷத்திற்கு ஒருமுறை ரீ-ரிலீஸ் செஞ்சாகூட ரசிகர்கள் அதைக் கொண்டாடத் தயாராக இருக்காங்க.

ஏன்னா, ஒவ்வொரு வருஷமும் ஸ்கூல், காலேஜ் முடிச்சுப் பிரிஞ்சு போன நண்பர்கள் எல்லாம் மீண்டும் ஒண்ணு சேர்ந்து அந்தப் படத்தைப் பார்க்க வரும்போது கிடைக்கிற சந்தோஷமே தனி.

10 வருஷத்துக்கு ஒருமுறை ரீ-ரிலீஸ் பண்றதை விட, வருஷத்துக்கு ஒரு முறை ரீ-ரிலீஸ் பண்ணினால்கூட '96' ரசிகர்களுக்குக் கொண்டாட்டமானதாக இருக்கும்.

உண்மையைச் சொல்லப்போனா நான் பள்ளி, கல்லூரிக்குப் போய் அதிகம் படிக்காதவன். இந்தப் படத்தைப் பார்த்தபோது, 'அச்சச்சோ, நாமளும் நல்லா ஸ்கூல், காலேஜ் எல்லாம் முடிச்சிருந்தா இந்த எமோஷனை இன்னும் நல்லா அனுபவிச்சிருக்கலாமே'ன்னு தோணுச்சு.

என்னை மாதிரி படிக்காத பலருக்கும் 'நாமளும் ஸ்கூலுக்குப் போயிருந்தா இந்த மாதிரி ஒரு நட்பு, அழகான அனுபவங்கள் நமக்குக் கிடைச்சிருக்குமே'ங்கிற ஏக்கம் கண்டிப்பா உருவாகியிருக்கும்.

இந்தப் படத்தின் படப்பிடிப்பிற்குப் போகும்போது எனக்குப் புது இடத்திற்குப் போற மாதிரியே தெரியல. ஏன்னா விஜய் சேதுபதி எனக்கு கூத்துப் பட்டறை காலத்திலிருந்தே ரொம்ப நெருங்கிய நண்பர்.

அதேபோல நடிகை திரிஷா கூடவும் 'கில்லி' படத்துல நடிச்சிருக்கேன். உதவி இயக்குநர்கள், இயக்குநர் பிரேம்குமார் சார் வரை எல்லோருமே ரொம்ப அன்பா, இயல்பா பழகுனாங்க.

ஒரு ரீ-யூனியன் விழாவுக்குப் போனா எப்படி இருக்குமோ, அப்படித்தான் எனக்கு '96' ஷூட்டிங் ஸ்பாட் இருந்தது. விஜய் சேதுபதியை எனக்குக் கிட்டத்தட்ட 15 வருஷமா தெரியும். ரொம்ப யதார்த்தமான, அதேநேரம் தீவிரமான முயற்சிகளைக் கைவிடாத ஒரு மனிதர் அவர்.

24 மணி நேரமும் சினிமா, சினிமான்னு ஓடி அதுலயே வெற்றி கண்டவர். 'முயற்சி செஞ்சா ஜெயிக்கலாம்'ன்ற தத்துவத்தை நேரடியாக நிரூபிச்சுக் காட்டினவர் விஜய் சேதுபதி.

அவர் மேல எனக்கு எப்போதுமே பெரிய அக்கறையும் அன்பும் உண்டு. அவரோட வளர்ச்சி எனக்கு ரொம்பவே சந்தோஷத்தைத் தருது.

அவர் கூட '96' படத்துலதான் முதல்முறையாக இணைந்து நடிச்சேன். இந்தியாவில் இருக்கிற சிறந்த நடிகர்கள்ல அவரும் ஒருவர். கேமராவுக்கு முன்னாடி அவர் எப்படி நடிக்கிறார், ஒரு சின்ன விஷயத்தைக் கூடப் பிரம்மாண்டமாக மெருக்கேற்றி செய்வார்.

96 படம் எத்தனை வருஷம் ஆனாலும் பழைய படமா தெரியாது, எப்பப் பார்த்தாலும் நேத்து ரிலீஸ் ஆன படம் மாதிரியே ஒரு ஃபிரெஷ்ஷான ஃபீல் கொடுக்கும்" என்றவர் அவருடைய அடுத்தப் படங்கள் குறித்து, "தற்போது கார்த்தி சாருடன் 'மார்ஷல்' படத்துல நடிச்சிட்டு இருக்கேன்.

இதுதவிர 'இறைமகன்' என்கிற படத்துல நான் கதாநாயகனாக நடிக்கிறேன். இதைத் தாண்டி இன்னும் ரெண்டு மூணு சின்னப் படங்களும் கைவசம் இருக்கு.

சினிமாவுல இப்போ ஒவ்வொரு வாரமும் புதுப் புது படங்கள், புது நடிகர்கள் வந்துட்டே இருக்காங்க. அதனால் நடிகர்கள் எப்போதும் பரபரப்பாக இயங்கிட்டே இருக்க வேண்டியிருக்கு. கூடிய சீக்கிரமே ஒரு பெரிய படத்தோட உங்களை நேரில் சந்திக்கிறேன்!" என உற்சாகத்தோடு முடித்துக் கொண்டார்.