“திமுக-அதிமுக கூட்டணிக்குப் பேசவில்லை; தவெகவுடன்தான் பேசினோம்” - TTV தினகரன் ட்விஸ்ட்

வருகிற 6-ம் தேதி, தமிழ்நாட்டில் தாராபுரம், மதுராந்தகம் தொகுதிகளில் இடைத்தேர்தல் நடக்க உள்ளது.

இந்தத் தேர்தலில் வெற்றி பெற தவெக, திமுக, அதிமுக, கம்யூனிஸ்ட் ஆகிய கட்சிகள் களத்தில் பம்பரமாகச் சுற்றி வருகின்றன.

இந்தத் தொகுதிகளில் வெற்றி பெற்ற அதிமுக எம்.எல்.ஏக்கள் பதவி விலகி, தவெகவில் சேர்ந்ததால்தான், இந்த இரு தொகுதிகளும் தற்போது தேர்தலைக் காண்கின்றன.

இதனால், அதே வேட்பாளர்களை களத்தில் இறக்கி வெற்றி பெற வேண்டிய சூழலில் இருக்கிறது தவெக. எதிர்க்கட்சியாக இந்த இரு தொகுதிகளிலும் எப்படியாவது வெற்றி பெற்றுவிட வேண்டும் என்று வேலை பார்த்து வருகிறது திமுக.

தங்களுடைய எம்.எல்.ஏக்கள்தான் பதவி விலகி, தவெகவில் சேர்ந்துள்ளதால், இந்தத் தேர்தல் அதிமுகவிற்குக் கௌரவப் பிரச்னை.

இப்படி மும்முனைப் போட்டியால்தான் தாராபுரம், மதுராந்தகம் களம் இருந்து வருகிறது.

பதவி விலகி தவெகவில் இணைந்த மரகதம் குமரவேல் (மதுராந்தகம்), சத்யபாமா (தாராபுரம்) ஆகியோர்தான் தவெகவின் வேட்பாளர்கள்.

இவர்கள் அதிமுகவிலிருந்து விலகித் தவெகவில் இணைந்துவிட்டார்கள் என்கிற விமர்சனத்தோடுதான் பிரசாரக் களங்களில் இவர்களை மக்கள் அணுகுகிறார்கள்.

இதை மாற்றியமைக்க, ‘திமுக, அதிமுகவும் இணைந்து ஆட்சி அமைக்கத் திட்டமிட்டதால், அதைப் பிடிக்காமல் இந்த இருவரும் பதவி விலகினார்கள்’ என்கிற கோணத்தில் இந்தப் பிரச்னையை தவெக மடைமாற்ற முயலுகிறது.

இந்த நேரத்தில் அமமுக கட்சி பொதுச்செயலாளர் டி.டி.வி.தினகரன் புதிதாக ஒன்றைப் பேசியுள்ளார்.

நேற்று பத்திரிகையாளர் சந்திப்பில், “திமுக-அதிமுக இணைந்து ஆட்சி அமைக்க நினைத்தது... அதற்கு பாஜக ஆதரவு அளித்தது என்று யார் கூறுவதும் தவறு.

107 சீட்டுகளோடு தவெகவால் ஆட்சி அமைக்க முடியாது என்பதால், தவெக உடன் கூட்டணி வைத்து, எங்களது கூட்டணித் தலைவர் எடப்பாடி பழனிசாமியை முதல்வராக நினைத்தோம்... முயன்றோம். ஆனால், ஒத்துக்கொள்ளப்படவில்லை. அதனால், திருமாவளவனை முதல்வராக்க நினைத்தோம்.

இதில் திமுகவும், பாஜகவும் சம்பந்தப்படவில்லை. இதைப் பலமுறை கூறிவிட்டோம். நான் இதை மே 8-ம் தேதி கூடச் சொல்லியிருக்கிறேன்” என்று பேசியிருக்கிறார்.

ஆக, இந்த இடைத்தேர்தல்கள் பிரசாரங்களில் புதுக்கோணம் ஒன்றைக் கொண்டுவந்திருக்கிறார் தினகரன். இது கைக்கொடுக்குமோ... கொடுக்காதோ?