"உங்கள் கூலிப்படையினரை வேண்டுமானாலும் அழையுங்கள்" - அமித் ஷாவிற்கு 'தேதி' சொல்லும் ராகுல் காந்தி

தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்று டெல்லி ஜந்தர் மந்தரில் நேற்று மாணவர்கள் போராட்டம் நடத்தினர்.

போராட்டத்தில் ஈடுபட்ட மாணவர்களை டெல்லி போலீசார் கைது செய்தனர்.

இதற்கு எதிர்ப்புத் தெரிவித்து மக்களவை எதிர்க்கட்சித் தலைவர் ராகுல் காந்தி தனது எக்ஸ் பக்கத்தில் பதிவிட்டுள்ளதாவது...

“அமித் ஷாவின் டெல்லி காவல்துறை ரவுடித்தனத்தில் இறங்கியுள்ளது.

பெண்கள் மற்றும் இளைஞர்கள் மீது வன்முறையை அவிழ்த்துவிட RSS-BJP-யின் உண்மையான கூலிப்படையினருக்கு அது பகிரங்கமாக உரிமமும் ஊக்கமும் அளித்து வருகிறது.

நான் ஏற்கனவே கூறியதுபோல், மோடியும் அவரது அரசும் எந்தளவுக்கு ஒடுக்குமுறையைக் கையாளுமோ, அந்தளவுக்கு Gen Z மற்றும் மாணவர்களின் கோபம் வெடித்துப் பெருகும்.

வீதியில் இறங்குவார்கள்...

அக்டோபர் 12 திங்கள்கிழமை அன்று, காங்கிரஸ், ஒட்டுமொத்த ‘இந்தியா’ கூட்டணி மற்றும் நாட்டின் இளைஞர்கள் மீண்டும் லட்சக்கணக்கில் வீதியில் இறங்குவார்கள்.

இந்த முறையும், அந்த முழக்கம் முன் எப்போதும் இல்லாத அளவுக்கு உரக்க நாடு முழுவதும் எதிரொலிக்கும்.

அமித் ஷா உங்களால் முடிந்த அளவு காவல்துறையைக் கூட்டி வாருங்கள்—10 ஆயிரமோ, 20 ஆயிரமோ, 40 ஆயிரமோ கூட்டி வாருங்கள்.

உங்களுக்குத் தேவையான எத்தனை BJP-RSS கூலிப்படையினரை வேண்டுமானாலும் அழைத்துக்கொள்ளுங்கள்.

நாங்கள் பயந்து ஓடுபவர்கள் அல்ல. பின்வாங்குபவர்களும் அல்ல.

இந்தப் போராட்டம் இனி நிற்கப்போவது இல்லை!

என்ன செய்வோம்?

திங்கள்கிழமை அன்று, நாங்கள் தலைமை நீதிபதியையும் சந்திப்போம்; டெல்லி வீதிகளில் அரசியலமைப்புச் சட்டம் கிழித்து எறியப்படும்போதும், ஜனநாயகம் நசுக்கப்படும்போதும்,

சட்டத்தின் பாதுகாவலர்கள் கண்களை மூடிக்கொண்டு உட்கார்ந்திருக்கக் கூடாது என்று வலியுறுத்துவோம்.

அரசியலமைப்புச் சட்டம் துண்டு துண்டாகக் கிழிக்கப்படும்போது நாங்கள் அமைதியாக வேடிக்கை பார்ப்போமா?

அது ஒருபோதும் நடக்காது. பொறுப்பானவர்களை நாங்கள் தட்டிக்கேட்டே தீருவோம்!”