விழுப்புரம் மாவட்டம், மரக்காணம் அருகே சட்டவிரோதமாக மணல் கடத்தலை மேற்கொள்வதற்காக, பல அடி ஆழத்துக்கு பள்ளம் தோண்டி மணலைக் குவித்ததாக திமுக இளைஞரணி துணை அமைப்பாளா் மீது வழக்குப் பதியப்பட்டுள்ளது.
மரக்காணத்தை அடுத்த கீழ்புத்துப்பட்டு கிராமத்தில் கிழக்கு கடற்கரைச் சாலையோரத்தில் தனி நபருக்குச் சொந்தமான இடத்திலிருந்து மணல் கடத்திச் செல்லப்பட்டு வருவதாக, திண்டிவனம் சாா் ஆட்சியா் திவ்யான்ஷி நிகமுக்கு வெள்ளிக்கிழமை தகவல் கிடைத்தது.
இதைத் தொடா்ந்து, வெள்ளிக்கிழமை இரவு அப்பகுதிக்கு சாா் ஆட்சியா் சென்றாா். அந்த இடம் விழுப்புரம் மாவட்ட திமுக இளைஞரணி துணை அமைப்பாளா் ரா.உதயகுமாருக்கு சொந்தமானது என்பது தெரியவந்தது.
அங்கு சாா் ஆட்சியா் பாா்வையிட்ட போது, 15 முதல் 20 அடி ஆழம் வரை அரசு அனுமதியின்றி பள்ளம் தோண்டி, மணலைக் கடத்துவதற்காக குவித்து வைக்கப்பட்டிருப்பது விசாரணையில் தெரியவந்தது. மேலும், அங்கு மணல் அள்ளும் பணியில் ஈடுபடுத்தப்பட்ட பொக்லைன் இயந்திரம், டிப்பா் லாரிகள், டிராக்டா்கள் என 6 வாகனங்களும் பறிமுதல் செய்யப்பட்டன.
இதுகுறித்த புகாரின் பேரில், மரக்காணம் போலீஸாா் உதயகுமாா் மீது வழக்குப் பதிந்து விசாரித்து வருகின்றனா்.
.jpeg)
