அரசு நிகழ்ச்சி மேடையில் நயினார் நாகேந்திரன்: "மோசமான முன்னுதாரணம்"- நிர்மல் குமார் காட்டம்

நேற்று சென்னை ஐ.ஐ.டி. மெட்ராஸில் இந்திய பிரதமர் மோடி, தமிழ்நாடு முதலமைச்சர் விஜய் கலந்துகொண்ட நிகழ்ச்சி ஒன்று நடைபெற்றது.

அந்த நிகழ்ச்சியின் மேடையில் தமிழ்நாடு பாஜக தலைவர் நயினார் நாகேந்திரனும் அமர்ந்திருந்தார்.

மாணிக்கம் தாகூர் கேள்வி

இதுகுறித்து தமிழ்நாடு காங்கிரஸ் கமிட்டி தலைவர் மாணிக்கம் தாகூர், “மத்திய அரசின் நிகழ்ச்சியில் பிரதமருடன் மேடையில் பாஜக மாநிலத் தலைவர் நயினார் நாகேந்திரன் எந்த புரோட்டோகால் மூலம் அமரவைக்கப்பட்டார்?” என்று கேள்வி எழுப்பியிருந்தார்.

நிர்மல் குமார் பதில்

மாணிக்கம் தாகூரின் கேள்விக்குப் பதில் அளிக்கும் வகையில் மின்சாரத் துறை அமைச்சர் நிர்மல் குமார், “ஒன்றிய அரசு நடத்திய நிகழ்ச்சியில், எம்.எல்.ஏ. அல்லது எம்.பி. போன்ற எந்தவொரு மக்கள் பிரதிநிதித்துவப் பொறுப்பிலும் இல்லாத கட்சிச் சார்ந்த நபர் எந்தப் புரோட்டோகாலின் அடிப்படையில் மேடையில் அமர வைக்கப்பட்டார் என்று தெரியவில்லை.

இது ஒரு தவறான மற்றும் மோசமான முன்னுதாரணம்.

நிலைமை எவ்வாறு இருக்கும்?

கட்சிச் சார்ந்த நபர்களை விளம்பரப்படுத்துவதற்கோ அல்லது ஊக்குவிப்பதற்கோ (promote) அரசு நிகழ்ச்சிகளைப் பயன்படுத்தக் கூடாது. இத்தகைய நடவடிக்கைகளை ஒன்றிய அரசு எதிர்காலத்தில் கண்டிப்பாகத் தவிர்க்க வேண்டும்.

புரோட்டோகால் இல்லாமல் அரசு நிகழ்ச்சிகளில் பங்கேற்பதை அனுமதிக்கும் இத்தகைய தவறான முன்னுதாரணத்தை இந்தியா முழுவதிலும் உள்ள பல்வேறு மாநில அரசுகள் பின்பற்றத் தொடங்கினால் நிலைமை எவ்வாறு இருக்கும்?

எங்களது கட்சியின் நிர்வாகிகள் அரசுப் பள்ளிகளுக்குக்கூடச் செல்லக் கூடாது என்று பொதுச்செயலாளர் அறிவித்துள்ள நிலையில்,

ஒரு மிகப்பெரிய அரசு நிகழ்ச்சியில் எம்.எல்.ஏ. அல்லது எம்.பி. இல்லாத ஒருவரை அமர வைத்தது மிகப்பெரிய தவறு” என்று பேசியுள்ளார்.