காஸாவைக் கைப்பற்றும் அமெரிக்கா: டிரம்ப் அறிவிப்பு!

காஸாவை அமெரிக்கா கைப்பற்றவிருப்பதாக அதிபர் டொனால்ட் டிரம்ப் அறிவித்தார்.

அமெரிக்க அதிபர் தேர்தலின்போது, உலகில் போர் நடக்க விடமாட்டேன் என்று அதிபர் டொனால்ட் டிரம்ப் கூறியிருந்தார். இந்த நிலையில், இஸ்ரேல் - காஸா போர் நிறுத்த ஒப்பந்தத்துக்கிடையே இஸ்ரேல் பிரதமர் பெஞ்சமின் நெதன்யாகுவை அமெரிக்க அதிபர் டிரம்ப் வெள்ளை மாளிகையில் சந்தித்துப் பேசினார்.

இதனைத் தொடர்ந்து, செய்தியாளர்களுடன் டிரம்ப் பேசியதாவது, ``இது அவ்வளவு எளிதான முடிவு அல்ல. காஸா பகுதியில் உள்ள பாலஸ்தீனியர்கள் வேறு இடங்களில் மீள்குடியேற்றப்படுவார்கள். பாலஸ்தீனியர்கள் திரும்பிச் செல்ல வேண்டும் என்று நினைக்கவில்லை. காஸா முனையில் உள்ள பாலஸ்தீனியர்கள் எகிப்து மற்றும் ஜோர்டான் போன்ற மத்திய கிழக்கு நாடுகளுக்கு அனுப்பப்படுவர். காஸா பகுதியில் வாழ முடியாது. அவர்களுக்கு இன்னொரு இடம் தேவை என்று நினைக்கிறேன்.

பாலஸ்தீனியர்கள் வேறு இடத்தில் குடியேறிய பிறகு, போரால் பாதிக்கப்பட்டுள்ள காஸாவை அமெரிக்கா கைப்பற்றும். அப்பகுதியில் பாதுகாப்புப் பணிகளில் அமெரிக்க ராணுவம் ஈடுபடுத்தப்படும். காஸாவில் உள்ள வெடிக்காத குண்டுகள் மற்றும் பிற ஆயுதங்களும் அகற்றப்படும்; சிதைந்த கட்டடங்களை தரைமட்டமாக்கப்படும்.

இதையும் படிக்க:டிரம்ப் மகனுக்கு சிறைத் தண்டனை வழங்கும் இத்தாலி?

பின்னர், அப்பகுதி மக்களுக்கு வேலைவாய்ப்புகள், வீடுகள் உள்ளிட்ட வசதிகளை வழங்கும் வகையில் ஒரு பெரியளவிலான பொருளாதார வளர்ச்சியை அமெரிக்கா உருவாக்கும். பாலஸ்தீனியர்கள் உள்பட உலக மக்கள் வாழும் இடமாக காஸா உருவாகும். கூடுதலாக, ஹமாஸுக்கு பணத்தை வழங்கியதுடன், மனிதகுலத்துக்கு மிகவும் விசுவாசமற்ற ஐ.நா. நிவாரண மற்றும் பணி நிறுவனத்துக்கு அளிக்கப்பட்டு வந்த அனைத்து ஆதரவையும் நிறுத்தும் அறிவிப்பை வெளியிடுவதிலும் மகிழ்ச்சியடைகிறேன்’’ என்று தெரிவித்தார்.

இதனைத் தொடர்ந்து, காஸா மீதான டிரம்ப்பின் புதிய யோசனை வரலாற்றில் இடம்பெறக்கூடிய ஒன்றாகவும், வரலாற்றை மாற்றக்கூடியதாகவும் இருக்கும். இது மத்திய கிழக்கின் புவிசார் அரசியலில் குறிப்பிடத்தக்க தாக்கத்தை ஏற்படுத்தும் என்று நெதன்யாகு கூறினார்.

காஸா பகுதியை ஆளும் ஹமாஸ் பயங்கரவாதிகள் அக்டோபர், 2023-ல் இஸ்ரேல் மீது நடத்திய தாக்குதலில் 1,200 பேர் கொல்லப்பட்டதுடன், 252 பேரை பணயக் கைதிகளாகவும் பிடித்து வைக்கப்பட்டனர். இதன் பதிலடியாக காஸா மீது இஸ்ரேல் போர் தொடுத்தது. 15 மாதங்களாக இஸ்ரேல் நடத்திய இந்தப் போரில், காஸாவில் 17,400-க்கும் மேற்பட்ட குழந்தைகள் உள்பட 47,700-க்கும் மேற்பட்டோர் உயிரிழந்தனர். மேலும், 20.3 லட்சத்துக்கும் மேற்பட்டோர் காஸாவில் இருந்து புலம்பெயர்ந்தனர். காஸாவில் உள்ள 4,36,000 (92%) கட்டடங்கள் இஸ்ரேலிய தாக்குதலில் அழிக்கப்பட்டுள்ளன; 546 பள்ளிகளில் 496 பள்ளிகள் சேதமடைந்துள்ளன, மேலும், 36 மருத்துவமனைகளில் 17 மட்டுமே செயல்படுகின்றன.

இதனிடையே, ஓராண்டுக்கும் மேலான இஸ்ரேல் - காஸா போரை நிறுத்த அமெரிக்கா, இஸ்ரேல், கத்தார் நாடுகள் போர் நிறுத்தம் ஒப்பந்தம் மேற்கொண்டது. இதன்படி, போர் நிறுத்தக் காலமான 6 வாரங்களுக்கு இருதரப்பினரும் அமைதியாக இருக்க வேண்டும் என்று வலியுறுத்தப்பட்டது. இதனையடுத்து, ஜன. 19 ஆம் தேதியில் போர் நிறுத்தம் அமலுக்கு வந்தது.