`ரிஸ்க் எடுத்தால் ரூ.1 கோடி!'- Hormuz-ல் கப்பலை இயக்குபவர்களுக்கு `ஆஃபர்' வழங்கும் நிறுவனங்கள்!

உயிருக்கு ஆபத்து நிறைந்த கடல் வழியில் எண்ணெய் கப்பல்களை இயக்கும் கேப்டன்களுக்கு மாதம் சுமார் ரூ.1 கோடி சம்பளம், அதோடு ஒவ்வொரு பயணத்துக்கும் பல லட்சம் ரூபாய் போனஸ் வழங்கப்படும் என்ற அறிவிப்பு, கவனம் பெற்றிருக்கிறது.

ஆபத்தான ஹார்முஸ் நீரிணை

மேற்கு ஆசியாவில் உள்ள ஹார்முஸ் நீரிணை, உலகின் மிக முக்கியமான எண்ணெய் போக்குவரத்து பாதைகளில் ஒன்று. போர் தொடங்குவதற்கு முன்பு, தினமும் சுமார் 135 கப்பல்கள் இந்த நீரிணையைக் கடந்து சென்றன. உலகின் எண்ணெய் மற்றும் திரவ இயற்கை எரிவாயு விநியோகத்தில் சுமார் ஐந்தில் ஒரு பங்கு இந்தப் பாதையைச் சார்ந்திருந்தது.

ஆனால் தற்போது இந்தப் பகுதியில் கப்பல்கள் மீது ஏவுகணை மற்றும் ட்ரோன் தாக்குதல்கள் அதிகரித்துள்ளன. இதனால் கப்பல் நிறுவனங்கள், ஆபத்தை ஏற்று இந்த வழியாகச் செல்லும் ஊழியர்களுக்கு அதிக தொகையை வழங்குகின்றன.

மாதம் $1 லட்சம்… பயணத்துக்கு $50,000 போனஸ்!

ஹார்முஸ் நீரிணையைக் கடக்கும் எண்ணெய் கப்பல்களின் கேப்டன்களுக்கு மாதத்திற்கு சுமார் $100,000 வரை வழங்கப்படுகிறது. இந்திய மதிப்பில் இது ரூ.90 லட்சத்துக்கும் அதிகம்.

இதுமட்டுமன்றி, ஒவ்வொரு ஹார்முஸ் பயணத்துக்கும் $50,000 வரை கூடுதல் போனஸ் வழங்கப்படுகிறது.

வழக்கமாக மாதம் சுமார் $15,000 சம்பாதிக்கும் கேப்டன்களுக்கு இது மிகப்பெரிய உயர்வு. சாதாரண கப்பல் பணியாளர்களுக்கும் அவர்களின் வழக்கமான சம்பளத்தை விட 4 முதல் 6 மடங்கு வரை கூடுதல் தொகை வழங்கப்படுகிறது.

இதற்கு முன்பும் நடந்துள்ள தாக்குதல்கள்

இந்த ஆபத்து வெறும் அச்சம் மட்டுமல்ல. 2026-ல் ஹார்முஸ் பகுதியைச் சுற்றிய கடல் வழிகளில் பல கப்பல்கள் தாக்கப்பட்டுள்ளன. ஜூன் மாதம் MT Settebello என்ற எண்ணெய் கப்பல் மீது நடத்தப்பட்ட தாக்குதலில் தீ விபத்து ஏற்பட்டு, மூன்று கடற்பணியாளர்கள் உயிரிழந்தனர்.

தற்போதைய நிலவரப்படி, பிப்ரவரி 28 முதல் குறைந்தது 93 கப்பல்கள் தாக்கப்பட்டதாகவும், 24 கடற்பணியாளர்கள் உயிரிழந்ததாகவும் தெரிவிக்கப்பட்டுள்ளது. இதனால் இந்த வழித்தடத்தில் பணிபுரிவது மிகப்பெரிய ஆபத்தாக மாறியுள்ளது.

உயிரைப் பணயம் வைத்து எண்ணெய் போக்குவரத்தை தொடர்ந்து இயக்க வேண்டிய சூழலில், இந்த மிகப்பெரிய “Danger Pay” வழங்கப்படுகிறது.