`ஹோலோகிராம் டு ரோபோட்' - ஹைடெக் பிரசாரத்தில் கலக்கும் தவெக-வினர்!

கோவை தெற்கு தொகுதி வேட்பாளர் செந்தில்குமார் நேற்று (20.04.2026) தேர்தல் பிரசாரத்தில் ஈடுபட்டபோது, ரோபோட்டுடன் இணைந்து வீதியோரங்களில் நடைபயணம் மேற்கொண்டு வாக்கு சேகரித்தார்.

ரோபோட்டின் கழுத்தில் கட்சிக் கொடி அச்சிடப்பட்ட துண்டு அணிவிக்கப்பட்டிருந்தது. இதைப் பார்த்த பொதுமக்கள் ஆச்சர்யத்துடன் ரசித்து, புகைப்படங்கள் எடுத்து மகிழ்ந்தனர். மனிதர்களை விட ரோபோட்டே அதிக கவனத்தை ஈர்த்தது என்பது குறிப்பிடத்தக்கது.

இதற்கு முன்பே த.வெ.க-வினர் கும்பகோணம் தொகுதியில் நடைபெற்ற தேர்தல் பிரசாரத்தில் 3D ஹோலோகிராம் தொழில்நுட்பத்தைப் பயன்படுத்தியிருந்தனர்.

இந்த முறையில், விஜய் ஒரே நேரத்தில் பல இடங்களில் நேரில் தோன்றுவது போன்ற காட்சியை உருவாக்கி, மக்களிடையே ஆச்சர்யத்தை ஏற்படுத்தினர். குறிப்பாக இளைஞர்கள் மத்தியில் இந்த நவீன தொழில்நுட்பம் அதிக ஈர்ப்பை ஏற்படுத்தியது.

தற்போதைய தேர்தல் பிரசாரங்களில் ரோபோட், ஹோலோகிராம் போன்ற தொழில்நுட்பங்கள் இணைந்து புதிய பரிமாணத்தை உருவாக்கி வருகின்றன.

பாரம்பர்ய முறைகளைத் தாண்டி, வாக்காளர்களின் கவனத்தை ஈர்க்கும் முயற்சியாக இது பார்க்கப்படுகிறது. இன்னும் சில வருடங்களில் வாக்கு கேட்க வேட்பாளர் வரமால், ரோபோட்டே வீட்டுக்குள் வந்து ‘ஓட்டு போடுங்க’ என்று ரிமைண்டர் கொடுக்கும் போல!