17 வயது மாணவி கர்ப்பம்; இளைஞர் தலைமறைவு; கருவைக் கலைத்த மருத்துவர்கள் கைது; பகீர் பின்னணி

கன்னியாகுமரி பகுதியைச் சேர்ந்தவர் தனேஷ்(26). இவருக்கு திருமணம் ஆகி அனிதா ரோஸ் என்ற மனைவி உள்ளார். தனேஷின் வீட்டுக்கு அருகே வசிக்கும் 17 வயது சிறுமி நர்சிங் கல்லூரியில் முதலாம் ஆண்டு படித்து வருகிறார்.

தனேஷும், மாணவியும் சில மாதங்களாக நெருங்கி பழகியுள்ளனர். இதில் மாணவி கர்ப்பம் அடைந்துள்ளார். மாணவியின் உடலில் ஏற்பட்ட மாற்றத்தைக் கவனித்த அவரது பெற்றோர் அதுபற்றி கேட்டுள்ளனர். அதில் மாணவி கர்ப்பமான தகவல் அவரது பெற்றோருக்குத் தெரியவந்தது.

கர்ப்பத்துக்குக் காரணம் தனேஷ் என்பதை மாணவி பெற்றோரிடம் தெரிவித்தார். இதனால் அதிர்ச்சி அடைந்த மாணவியின் பெற்றோர், வெளியே தெரிந்தால் அவமானம் ஆகிவிடும் என நினைத்து, தனேஷ் மற்றும் அவரது மனைவி அனிதா ரோஸிடம் கலந்து பேசி கர்ப்பத்தைக் கலைப்பது என்று முடிவெடுத்தனர்.

தனேஷ் மற்றும் அவரது மனைவி அனிதாரோஸ் இருவரும் அந்த மாணவியை நாகர்கோவிலில் ரயில் நிலையம் செல்லும் சாலையில் உள்ள ஒரு தனியார் மருத்துவமனைக்கு அழைத்துச் சென்று கருக்கலைப்பு செய்துள்ளனர்.

18 வயது பூர்த்தியாகாத மாணவிக்குக் கருக்கலைப்பு செய்த விவகாரம் அப்பகுதியைச் சேர்ந்தவர்களுக்குத் தெரியவந்துள்ளது. இதையடுத்து அந்த மாணவி தனக்கு கருகலைப்பு செய்யப்பட்டது குறித்தும், அதற்கு காரணமானவர்கள் பற்றியும் கன்னியாகுமரி அனைத்து மகளிர் போலீஸில் புகார் செய்தார்.

புகாரின் பேரில் போலீஸார் விசாரணை நடத்தி கருக்கலைப்பு செய்த டாக்டர் கிஷோர்(61), அவரது மகளான டாக்டர் சரண்யா (32), செவிலியர் ரேணுகா(56) ஆகியோர் மீது வழக்குப் பதிவு செய்ததுடன், மூவரையும் கைது செய்தனர்.

மூவரும் மருத்துவப் பரிசோதனையின்போது தங்களுக்கு உடல்நிலை பாதிப்பு எனக் கூறியதைத் தொடர்ந்து அவர்கள் போலீஸ் காவலில் ஆசாரிப்பள்ளம் அரசு மருத்துவக் கல்லூரி மருத்துவமனையில் அனுமதிக்கப்பட்டுள்ளனர். மாணவியைச் சிறார்வதை செய்த இளைஞர் தனேஷ் மீது கன்னியாகுமரி அனைத்து மகளிர் போலீஸார் போக்ஸோ வழக்குப் பதிவு செய்தனர்.

தனேஷின் குற்றத்தை மறைக்க உதவிய அவரது மனைவி அனிதா ரோஸ் மீதும் வழக்குப் பதிவு செய்யப்பட்டுள்ளது. தலைமறைவாக உள்ள இருவரையும்  போலீஸார்  தேடி வருகின்றனர்.