Asian Games: இலங்கைக்கு எதிராக இமாலய வெற்றி... முதல் தங்கம்; பதக்க வேட்டையில் இந்தியா!

2026 ஆசிய விளையாட்டுப் போட்டியில் இந்தியாவின் பதக்க வேட்டை 3-வது நாளில் புதிய வேகம் எடுத்துள்ளது. இலங்கையை 147 ரன்கள் வித்தியாசத்தில் வீழ்த்தி, பெண்கள் கிரிக்கெட் அணி இந்தியாவுக்கான முதல் தங்கப் பதக்கத்தை வென்றுள்ளது. இதனுடன் பேட்மிண்டனில் பதக்கம் உறுதியானதுடன், குத்துச்சண்டை, கபடி உள்ளிட்ட போட்டிகளிலும் இந்திய வீரர்கள் அசத்தியுள்ளனர்.

இலங்கையை சுருட்டிய இந்தியா... முதல் தங்கம்!

பெண்களுக்கான டி20 கிரிக்கெட் இறுதிப்போட்டியில் முதலில் பேட்டிங் செய்த இந்தியா, 20 ஓவர்களில் 3 விக்கெட் இழப்புக்கு 216 ரன்கள் குவித்தது. அதிகபட்சமாக ஸ்மிருதி மந்தனா 79 ரன்களும், ஷஃபாலி வர்மா 48 ரன்களும், ரிச்சா கோஷ் ஆட்டமிழக்காமல் 49 ரன்களும் எடுத்தனர். இலக்கை நோக்கி களமிறங்கிய இலங்கை அணிக்கு இந்திய பந்துவீச்சாளர்கள் எந்த வாய்ப்பையும் கொடுக்கவில்லை. தீப்தி சர்மா 3 விக்கெட்டுகளையும், ஸ்ரேயங்கா பட்டில் மற்றும் ஸ்ரீ சரணி தலா 2 விக்கெட்டுகளையும் வீழ்த்தினர். முடிவில், 15.4 ஓவர்களில் 69 ரன்களுக்கு இலங்கை ஆல்-அவுட்டானது. இதன் மூலம் 147 ரன்கள் வித்தியாசத்தில் அபார வெற்றி பெற்று, இந்தியா தனது தங்கப் பதக்கத்தைத் தக்கவைத்துக் கொண்டது.

பதக்கக் களத்தில் மற்ற விளையாட்டுகள்: ஷூட்டிங் முதல் கபடி வரை!

10 மீட்டர் ஏர் ரைபிள் கலப்பு அணிகள் தகுதிச்சுற்றில் இளவேனில் மற்றும் பார்த்த் மானே இணை 634.9 புள்ளிகளுடன் இரண்டாவது இடம் பிடித்தாலும், இறுதிச்சுற்றில் நான்காவது இடத்தைப் பிடித்து பதக்க வாய்ப்பை நழுவவிட்டது. பேட்மிண்டன் காலிறுதிப் போட்டியில் இந்திய ஆண்கள் அணி, ஜப்பானை 3-0 என்ற கணக்கில் வீழ்த்தி அரையிறுதிக்கு முன்னேறியுள்ளது.

லக்ஷ்ய சென், சாத்விக்சாய்ராஜ் - சிராக் ஷெட்டி மற்றும் ஆயுஷ் ஷெட்டி வெற்றிகள் மூலம் இந்தியாவுக்கு குறைந்தபட்சம் வெண்கலப் பதக்கம் உறுதி செய்யப்பட்டுள்ளது. குத்துச்சண்டையில் சாக்‌ஷி சவுத்ரி, பாரீஸ் ஒலிம்பிக் வெண்கலப் பதக்கம் வென்றவரான ஐரா வில்லெகாஸை 5-0 எனவும், ஜதுமணி சிங் நேபாள வீரரை வீழ்த்தியும் 'ரவுண்ட் ஆஃப் 16' சுற்றுக்கு முன்னேறினர். மேலும், ஆண்கள் கபடி பிரிவில் தென் கொரியாவை 63-31 என்ற கணக்கில் வீழ்த்தி இந்தியா அசத்தியுள்ளது.

7 பதக்கங்களுடன் உத்வேகம்!

3-வது நாள் முடிவில் இந்தியாவின் மொத்த பதக்க எண்ணிக்கை 7 ஆக உயர்ந்துள்ளது. இதில் 1 தங்கம், 4 வெள்ளி மற்றும் 2 வெண்கலப் பதக்கங்கள் அடங்கும். முதல் தங்கத்துடன் இந்தியாவின் பதக்க வேட்டை சூடுபிடித்துள்ள நிலையில், வரவிருக்கும் நாட்களில் மேலும் பல பதக்கங்களை இந்திய வீரர்கள் குவிப்பார்கள் என்ற எதிர்பார்ப்பு வலுத்துள்ளது.

நாளை என்ன?

நாளை நடைபெறவுள்ள 4-வது நாள் போட்டிகளில் இந்தியாவின் கவனம் தடகளம், பேட்மிண்டன் காலிறுதி, ஷூட்டிங், ஹாக்கி மற்றும் டேபிள் டென்னிஸ் மீது இருக்கும். குறிப்பாக, தடகளப் போட்டிகள் நாளை தொடங்குவதுடன், பேட்மிண்டனில் பதக்கத்தை உறுதி செய்யும் வகையில் பி.வி. சிந்து தலைமையிலான மகளிர் அணி ஜப்பானை எதிர்கொள்வது போன்ற முக்கியச் சந்திப்புகள் ரசிகர்களின் எதிர்பார்ப்பை மேலும் அதிகரிக்கச் செய்துள்ளன.