Asian Games: 10,000 மீட்டர் ரேஸ்; 16 ஆண்டுகளுக்குப் பிறகு இந்தியாவுக்கு பதக்கம்.. சீமா குமாரி சாதனை!

“முயற்சி திருவினையாக்கும்” என்பார்கள். அதை நிரூபிக்கும் வகையில், ஆசிய விளையாட்டுப் போட்டியில் இந்திய வீராங்கனை சீமா குமாரி வெண்கலப் பதக்கம் வென்று அசத்தியுள்ளார். ஜப்பானின் ஐச்சி-நகோயாவில் வியாழக்கிழமை நடைபெற்ற பெண்களுக்கான 10,000 மீட்டர் ஓட்டப்பந்தய இறுதிப் போட்டியில் சீமா 32 நிமிடங்கள் 50.05 விநாடிகளில் இலக்கை எட்டி மூன்றாவது இடத்தைப் பிடித்தார். இதன் மூலம், இந்தப் பிரிவில் இந்தியாவுக்கு 16 ஆண்டுகளுக்குப் பிறகு பதக்கம் கிடைத்துள்ளது.

ஆரம்பம் முதலே முன்னிலை

போட்டி தொடங்கியதில் இருந்தே முன்னணி வீராங்கனைகள் இடம்பெற்ற குழுவில் சீமாவும் இருந்தார். கடைசி மூன்று சுற்றுகள் எஞ்சியிருந்தபோது பஹ்ரைனின் வின்ஃப்ரெட் யாவி, ஜப்பானின் நோசோமி தனகா ஆகியோர் முன்னிலை பெற்றனர். இறுதியில் யாவி 32:39.18 நேரத்தில் தங்கமும், தனகா 32:41.54 நேரத்தில் வெள்ளியும் வென்றனர். சீமா 32:50.05 நேரத்துடன் வெண்கலத்தை வென்றுள்ளார்கள்.

2010-க்குப் பிறகு மீண்டும் பதக்கப் பாதையில் இந்தியா!

பெண்களுக்கான 10,000 மீட்டர் ஓட்டத்தில் இந்தியாவுக்கு கடைசியாக 2010-ம் ஆண்டு குவாங்சோ ஆசிய விளையாட்டுப் போட்டியில் பதக்கம் கிடைத்தது. அப்போது பிரீஜா ஸ்ரீதரன் தங்கமும், கவிதா ராவத் வெள்ளியும் வென்றிருந்தனர்.

நீண்ட இடைவெளிக்குப் பிறகு கிடைத்த இந்த வெண்கலம்,  இந்தியாவின் மூன்றாவது ஆசிய விளையாட்டுப் பதக்கமாக அமைந்துள்ளது. முன்னணி வீராங்கனைகளுடன் தொடக்கம் முதலே போட்டியிட்டு, இறுதிவரை தனது இடத்தைத் தக்கவைத்த சீமாவின் ஓட்டம், இந்த வெற்றிக்கு முக்கிய காரணமாக அமைந்தது. நீண்ட தூர ஓட்டத்தில் வேகத்தை மட்டும் நம்பாமல், பொறுமையுடன் ஓடுவதும் முக்கியம்.

அந்த வகையில் சீமா பந்தயம் முழுவதும் சீரான வேகத்தைப் பின்பற்றினார். இறுதிக்கட்டத்தில் முன்னணி வீராங்கனைகள் வேகத்தை அதிகரித்தபோதும், அவர் பதக்கத்துக்கான இடத்தை விட்டுக்கொடுக்காமல் போராடினார். இறுதியில் இந்தியாவுக்காக வெண்கலத்தை உறுதி செய்து, தனது பெயரை ஆசிய விளையாட்டுப் போட்டியின்  வரலாற்றில் பதிவு செய்துள்ளார். இந்தச் சாதனை நீண்ட தூர ஓட்டத்தில் இந்தியாவின் அடுத்த தலைமுறை வீராங்கனைகளுக்கும் நம்பிக்கை அளிக்கும் வகையில் அமைந்துள்ளது என்பதில் சந்தேகமில்லை.