Asian Games: `இரட்டை வெண்கலம்' சர்வேதேச அரங்கில் சாதித்து அசத்திய தமிழ்நாட்டின் ஜோஷ்னா சின்னப்பா

இந்திய ஸ்குவாஷ் வீராங்கனை ஜோஷ்னா சின்னப்பா, ஆசிய விளையாட்டுப் போட்டிகளில் இரண்டு வெண்கலப் பதக்கங்களை வென்று அசத்தியிருக்கிறார். கலப்பு இரட்டையர் பிரிவில் வேலவன் செந்தில்குமாருடன் இணைந்து ஒரு வெண்கலப் பதக்கத்தையும், மகளிர் அணிப் பிரிவில் இந்திய அணியின் சார்பில் மற்றொரு வெண்கலப் பதக்கத்தையும் அவர் கைப்பற்றியுள்ளார்.

ஸ்குவாஷ் களத்தில் இரண்டு தசாப்தங்களுக்கும் மேலாக இந்தியாவை பிரதிநிதித்துவப்படுத்தி வரும் ஜோஷ்னா, தனது ஏழாவது ஆசிய விளையாட்டுப் போட்டியில் களமிறங்கியுள்ளார். இதற்கு முன்பு இரண்டு வெள்ளி மற்றும் மூன்று வெண்கலப் பதக்கங்களை வென்றிருந்த நிலையில், இந்தப் போட்டியில் கிடைத்த இரண்டு வெண்கலப் பதக்கங்களால் அவரது ஆசிய விளையாட்டுப் பதக்க எண்ணிக்கை மேலும் உயர்ந்துள்ளது.

 பரபரப்பான கலப்பு இரட்டையர் போட்டி

கலப்பு இரட்டையர் பிரிவில் வேலவன் செந்தில்குமாருடன் இணைந்து விளையாடிய ஜோஷ்னா, தொடக்கம் முதலே சிறப்பான ஆட்டத்தை வெளிப்படுத்தினார். காலிறுதியில் பிலிப்பைன்ஸ் ஜோடியை வீழ்த்தி அரையிறுதிக்குள் நுழைந்த இந்திய ஜோடி, பதக்கத்தை உறுதி செய்தது.

அரையிறுதியில் ஹாங்காங் சீனாவின் லீ கா யி மற்றும் டாங் மிங் ஹாங் ஜோடியை எதிர்கொண்ட ஜோஷ்னா–வேலவன் இணை, கடுமையாகப் போராடினர். முதல் ஆட்டம் 10-11 என்ற கணக்கில் முடிந்தாலும், இரண்டாவது ஆட்டத்தில் இந்திய ஜோடி 11-2 என்ற வலுவான கணக்கில் வெற்றி பெற்று போட்டியை சமன் செய்தது. தீர்மானிக்கும் மூன்றாவது ஆட்டத்திலும் இரு ஜோடிகளுக்கும் இடையே கடுமையான போட்டி நிலவியது. இறுதியில் 10-11 என்ற மிகக் குறுகிய வித்தியாசத்தில் இந்திய ஜோடி தோல்வியடைந்தது.

இதனால் இறுதிப்போட்டிக்கான வாய்ப்பு தவறியபோதிலும், அரையிறுதியில் தோல்வியடைந்த அணிகளுக்கு வழங்கப்படும் வெண்கலப் பதக்கம் ஜோஷ்னா–வேலவன் ஜோடிக்கு உறுதியானது. இதன் மூலம் ஜோஷ்னா தனது ஆசிய விளையாட்டு பதக்கப் பட்டியலில் மேலும் ஒரு பதக்கத்தைச் சேர்த்தார்.

போட்டிக்குப் பிறகு பேசிய ஜோஷ்னா, ஆட்டத்தின் முடிவு ஏமாற்றமளித்தாலும், தனது இணை வீரரான வேலவன் செந்தில்குமாரின் ஆட்டத்தை நினைத்து பெருமைப்படுவதாகக் கூறினார். கடினமான போட்டிகள் மற்றும் ஏமாற்றங்களிலிருந்து மீண்டு வருவது ஒரு விளையாட்டு வீரரின் முக்கியமான பண்பு என்றும் அவர் குறிப்பிட்டார்.

 மகளிர்அணிப் பிரிவிலும் வெண்கலம்!

கலப்பு இரட்டையர் வெற்றியைத் தொடர்ந்து, மகளிர் அணிப் பிரிவிலும் ஜோஷ்னா இந்திய அணிக்காக களமிறங்கி மற்றொரு வெண்கலப் பதக்கத்தை வென்றுள்ளார். இந்திய மகளிர் அணி அரையிறுதியில் ஹாங்காங் சீனாவை எதிர்கொண்டது.

இந்திய அணிக்காக தன்வி கன்னா ஒரு வெற்றியைப் பதிவு செய்தார். ஆனால் மற்ற போட்டிகளில் இந்திய வீராங்கனைகள் வெற்றி பெற முடியாததால், இந்திய அணி 1-2 என்ற கணக்கில் தோல்வியடைந்தது. வெற்றியை தீர்மானிக்கும் போட்டியில் களமிறங்கிய ஜோஷ்னா சின்னப்பா, ஹாங்காங் சீனாவின் வீராங்கனையிடம் தோல்வியடைந்தார். இதனால் இந்திய மகளிர் அணிக்கு வெண்கலப் பதக்கம் கிடைத்தது.

அரையிறுதி தோல்வி இறுதிப்போட்டிக்கான வாய்ப்பைத் தடுத்தாலும், அணிப் பிரிவில் வெண்கலப் பதக்கம் இந்திய வீராங்கனைகளின் முயற்சிக்கு கிடைத்த அங்கீகாரமாக அமைந்தது. அதில் அனுபவம் வாய்ந்த ஜோஷ்னா சின்னப்பாவின் பங்களிப்பும் முக்கியமானதாக இருந்தது.

 சென்னையில் தொடங்கிய பயணம்… ஆசிய அரங்கில் தொடரும் சாதனை

ஜோஷ்னாவின் ஸ்குவாஷ் பயணம் சென்னையுடன் நெருங்கிய தொடர்புடையது. சிறுவயதில் சென்னை கிரிக்கெட் கிளப்பில் ஸ்குவாஷ் விளையாடத் தொடங்கிய அவர், பின்னர் இந்தியாவின் முன்னணி வீராங்கனைகளில் ஒருவராக உருவெடுத்தார். அவரது தந்தை அஞ்சன் சின்னப்பாவும் ஸ்குவாஷ் வீரராக இருந்ததுடன், ஆரம்பகாலத்தில் அவருக்கு பயிற்சியளித்தார்.

14 வயதிலேயே தேசிய சாம்பியன் பட்டத்தை வென்ற ஜோஷ்னா, சர்வதேச அரங்கிலும் பல சாதனைகளைப் படைத்துள்ளார். 2003-ல் ஆசிய ஜூனியர் சாம்பியனாகவும், பிரிட்டிஷ் ஜூனியர் ஓபன் பட்டம் வென்ற முதல் இந்திய வீராங்கனையாகவும் அவர் சாதித்தார்.

இப்போது ஆசிய விளையாட்டுப் போட்டியில் கலப்பு இரட்டையர் மற்றும் மகளிர் அணிப் பிரிவில் இரண்டு வெண்கலப் பதக்கங்களை வென்றிருப்பதன் மூலம், சென்னையின் ஜோஷ்னா சின்னப்பா இந்திய ஸ்குவாஷ் வரலாற்றில் தனது இடத்தை மேலும் வலுப்படுத்தியுள்ளார்.

ஒருபுறம் பல ஆண்டுகளாக தொடரும் அனுபவம்; மறுபுறம் இளம் வீராங்கனைகளுடன் இணைந்து களமிறங்கும் புதிய தலைமுறைக்கான ஊக்கம் — இரண்டையும் இணைக்கும் வீராங்கனையாக ஜோஷ்னாவின் பயணம் தொடர்கிறது.