Doctor Vikatan: கேப்ஸ்யூல் விழுங்க முடியாதவர்கள் உள்ளே உள்ள மருந்துப்பொடியை மட்டும் சாப்பிடலாமா?

Doctor Vikatan: தண்ணீருக்கு பதிலாக பால் குடிக்கும்போது அத்துடன் சேர்த்து மாத்திரைகள் போடலாமா... வெந்நீருடன் சேர்த்து மாத்திரைகள் போடலாமா? வயதானவர்களுக்கு கேப்ஸ்யூல் மாத்திரைகளை விழுங்க முடியாத நிலையில் உள்ளே உள்ள  மருந்தை மட்டும் கொடுப்பது சரியா? 

பதில் சொல்கிறார், சென்னையைச் சேர்ந்த பொது மருத்துவர் அருணாசலம்

மாத்திரைகளைப் பால் அல்லது  பால் பொருள்களுடன் எடுத்துக் கொள்ள வேண்டிய அவசியமில்லை. சில நேரங்களில் பால் அல்லது  பால் பொருள்களுடன் எடுப்பது மாத்திரையின் உறிஞ்சும் தன்மையைக் குறைத்துவிடலாம். அதன் வேலைத்திறனை மாற்றிவிடக்கூடிய வாய்ப்புகளும் உள்ளன. எனவே, தண்ணீரில் குடிக்க வேண்டிய மருந்துகளைக் கண்டிப்பாகத் தண்ணீரில் மட்டுமே குடிக்க வேண்டும்.  பாலில் எடுக்கக் கூடாது.

அளவுகடந்த சூடாக இல்லாமல், வெதுவெதுப்பான தண்ணீரில் மாத்திரைகளை எடுத்துக்கொள்வது தவறில்லை. அளவுக்கதிக சூடான நீரில் மாத்திரைகளை உட்கொள்ளும்போது, சில நேரங்களில் அந்த மருந்துகளின் குணாதிசயங்கள்  மாறுவதற்கு வாய்ப்புகள் இருக்கின்றன.

கேப்ஸ்யூல் மருந்துகளின் முக்கிய வேலையே, அது இரைப்பையில் கரையாமல் நேரடியாகக் குடலுக்கு மருந்தைக் கொண்டு சேர்ப்பதுதான்.  இரைப்பையில் உள்ள சக்திவாய்ந்த அமிலம், மருந்தின் வீரியத்தை மாற்றிவிடும் என்பதால், கேப்ஸ்யூல் மாத்திரையை உடைத்துச் சாப்பிடக் கூடாது. கேப்ஸ்யூலின் மேல் உறைதான் அந்த அமிலத்திடமிருந்து மருந்தைப் பாதுகாத்து, அது சரியாகக் குடலுக்குச் சென்று வேலை செய்ய உதவுகிறது. எந்த இடத்தில் கரைய வேண்டும் என்பதைக் கணக்கிட்டுதான் கேப்ஸ்யூலின் தடிமன் (thickness) மற்றும் அதன் தயாரிப்பு முறைகள் அமைக்கப்பட்டிருக்கும்.

எனவே, கேப்ஸ்யூலைப் பொடிசெய்து விழுங்குவது சரியான விஷயம் கிடையாது. அதை பாலுடனோ அல்லது வெந்நீருடனோ குடிப்பதும் தவறானது.  அதை அப்படியே முழுங்க வேண்டும். சந்தேகம் இருக்கும்பட்சத்தில், வேறு முறையில் உட்கொள்ளலாமா என்பதை மருத்துவர் அல்லது மருந்தாளுநரிடம் (Pharmacist) கேட்டுத் தெரிந்துகொள்ளலாம். மற்றபடி, கேப்ஸ்யூலில் உள்ள பவுடரை வெளியே எடுத்து விழுங்குவது அதன் வேலைத்திறனைக் குறைக்கும் அல்லது அதன் செயல்திறனையே இழக்க வைத்துவிடும்.



டாக்டர் அருணாசலம்:

32 ஆண்டுகள் அனுபவம் கொண்ட பொது மருத்துவரான டாக்டர் அருணாசலம், சென்னை கே.கே.நகரில் அருண் விஜயா மருத்துவமனையை நிர்வகித்து வருகிறார். 1994-ல் யு.எஸ்.எஸ்.ஆரின் மின்ஸ்க் அரசு மருத்துவக் கல்லூரியில் MD பட்டம் பெற்ற இவர், இந்திய மருத்துவக் கழகத்தின் (IMA) உறுப்பினராக இருக்கிறார். பொது மருத்துவம், வளரிளம் பருவத்தினருக்கான மருத்துவம் மற்றும் தடுப்பு மருத்துவம் போன்றவற்றில் நிபுணத்துவம் பெற்றவர்.


உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.