"Drishyam 3 படத்தைப் பார்த்து செய்தோம்" - நண்பனைக் கொன்ற மைனர் நண்பர்கள் சிக்கியது எப்படி?

மும்பை அருகில் உள்ள தானேயைச் சேர்ந்த 17 வயது நண்பர்கள் மூன்று வெவ்வேறு கல்லூரிகளில் படித்து வந்தனர். அவர்களில் ஒருவர் தங்க செயின் அணிந்து இருந்தார். மூன்று பேரும் 10வது வகுப்பு படித்து வந்த நிலையில் தங்க செயின் அணிந்திருந்த நபரைத் திடீரென காணவில்லை.

இது குறித்து அவரது பெற்றோர் கொடுத்த புகாரின் பேரில் போலீஸார் கடத்தல் வழக்குப் பதிவு செய்து விசாரித்தனர். இதையடுத்து காணாமல் போன நபரின் இரண்டு நண்பர்களைப் பிடித்து சென்று போலீஸார் விசாரித்தனர். விசாரணையில் போலீஸாரைத் திசை திருப்பும் வகையில் காணாமல் போன நபர் அடையாளம் தெரியாத ஒருவருடன் ஸ்கூட்டரில் சென்றதாக இரண்டு பேரில் ஒருவர் தெரிவித்தார்.

அந்த நபர் சொன்ன திசையில் ஸ்கூட்டர் சென்றதா என்பதைத் தெரிந்துகொள்ள 90க்கும் அதிகமான கண்காணிப்பு கேமரா பதிவுகளை போலீஸார் ஆய்வு செய்தனர்.

ஆனால் அந்த நபர் சொன்னது போன்று ஸ்கூட்டர் சென்றதற்கான எந்த வித அடையாளமும் தென்படவில்லை. இதையடுத்து மீண்டும் இரண்டு பேரிடம் தீவிர விசாரணை நடத்தியதில் கொலை செய்ததை உண்மையை ஒப்புக்கொண்டனர்.

பிடிபட்ட இரண்டு பேரில் ஒருவரின் பிறந்தநாளைச் சிறப்பாகக் கொண்டாடவும், ஒரு பைக் வாங்கவும் இருவரும் முடிவு செய்தனர். அதற்கு அவர்களது நண்பன் அணிந்திருந்த செயினைத் திருட முடிவு செய்தனர். இதற்கான அந்த நண்பரை ஆட்கள் நடமாட்டம் இல்லாத இடத்திற்கு அழைத்துச் சென்றனர். அங்கு வைத்து கத்தியால் குத்தி நண்பரைக் கொலை செய்தனர்.

பின்னர் அவர் அணிந்திருந்த தங்க செயினைத் திருடிச்சென்றது விசாரணையில் தெரிய வந்தது. போலீஸாரின் விசாரணையைத் திசை திருப்பவும், பிடிபடாமல் இருக்கவும் கொலை செய்யப்பட்ட நபரின் மொபைல் போனைச் சேதப்படுத்தி அதனை ஒரு பஸ்சில் போட்டுவிட்டு சென்று இருந்தனர். இதன் மூலம் காணாமல் போன நபர் ஒவ்வொரு இடமாகச் சென்று கொண்டு இருப்பது போன்று காட்ட இந்த முறையைக் கையாண்டனர். வெப் சீரியஸ் மற்றும் ஆன்லைன் காணொலிகளைப் பார்த்து இது போன்று செய்ததாக அவர்கள் போலீஸாரிடம் தெரிவித்தனர்.

மேலும் சமீபத்தில் நடிகர் அஜய் தேவ்கனில் திரிஷம் 3 படத்தைப் பார்த்து அதில் வருவது போல் செய்ய முடிவு செய்ததாக போலீஸாரிடம் தெரிவித்தனர். அவர்களிடம் மேற்கொண்டு விசாரணை நடத்தியதில் உடலைப் புதைப்பதற்காக இரண்டு பேரில் ஒருவர் கொலை நடந்த இடத்திற்குச் சென்று உடலைப் புதைக்கவும் முயற்சி செய்ததும் தெரிய வந்துள்ளது.

போலீஸார் சம்பவ இடத்திற்குச் சென்று கொலை செய்யப்பட்ட மாணவர் உடலை மீட்டனர். திருடப்பட்ட செயின் 7 கிராம் கொண்டது ஆகும்.