``இனி பெற்றோருடன் நேரத்தை செலவிட விரும்புகிறேன்..!" - மைக்ரோசாஃப்ட் துணைத் தலைவர் ஓய்வு அறிவிப்பு

ஐ.டி கம்பெனிகள் தொடர்ந்து ஆட்குறைப்பு நடவடிக்கையில் ஈடுபட்டு வருகின்றன. அமெரிக்க அதிபர் டொனால்டு ட்ரம்ப் விசாவிற்காக புதிய கட்டுப்பாடுகளை கொண்டு வந்த பிறகு இந்தியர்களிடம் படிப்படியாக அமெரிக்க மோகம் குறைந்து வருகிறது. அந்த வகையில் மைக்ரோசாஃப்ட் நிறுவனத்தில் துணை தலைவராக வேலை செய்து வரும் கேசவன் சண்முகம் தனது 23 ஆண்டுக்கால வேலையை ராஜினாமா செய்து, தனது ஓய்வை அறிவித்திருக்கிறார். அவரை மைக்ரோசாஃப்ட் நிர்வாகம் வேலையை விட்டு போகும்படி சொல்லவில்லை. அவர்தான் வேலையை ராஜினாமா செய்து இருக்கிறார். அதுவும் தனது பெற்றோருக்காக வேலையை விட்டு இருக்கிறார். எஞ்சி இருக்கும் நாட்களை பெற்றோருடன் செலவிட வேண்டும் என்று கருதி இந்த முடிவை எடுத்து இருக்கிறார்.

இது குறித்து அவர் தனது சமூக வலைதள பக்கத்தில் எழுதி இருப்பதாவது: "மைக்ரோசாஃப்ட் நிறுவனத்தில் 23 வருடங்கள் பணியாற்றிய பிறகு, இந்தியாவில் உள்ள எனது வயதான பெற்றோருடன் அதிக நேரம் செலவிடுவதற்காக இன்று ஓய்வு பெறுகிறேன்.

மைக்ரோசாஃப்ட்டில் உள்ள அற்புதமான சக ஊழியர்களிடமிருந்தும் விலகிச் செல்வது கடினமாக இருந்தது. ஆனால், குடும்பம் மற்றும் நண்பர்கள் மீது எனது அன்பை காட்ட இது எனக்கு சரியான தருணம் ஆகும்'' என்று குறிப்பிட்டுள்ளார்.

அவரது இந்த முடிவை நெட்டிசன்கள் பலரும் பாராட்டியுள்ளனர். இது குறித்து ஒருவர் வெளியிட்டுள்ள பதிவில், "உலகின் மிகவும் செல்வாக்கு மிக்க தொழில்நுட்ப நிறுவனம் ஒன்றில் தனக்கென ஒரு இடத்தை உருவாக்குவது நம்பமுடியாத சாதனையாகும். ஆனால் உங்கள் குடும்பத்திற்காக நீங்கள் விரும்பும் ஒன்றை விட்டு விலகுவது இந்த மாற்றத்தை இன்னும் அர்த்தமுள்ளதாக மாற்றுகிறது" என்று குறிப்பிட்டுள்ளார்.

சிலர் விசா தொடர்பான பிரச்னை காரணமாக இந்த முடிவை எடுத்தீர்களா என்றும் கேள்வி எழுப்பி இருக்கின்றனர். அதற்கு இது முழுக்க முழுக்க தனது தனிப்பட்ட முடிவு என்றும், குடும்பத்திற்காக எடுக்கப்பட்டது என்றும் சண்முகம் குறிப்பிட்டுள்ளார்.

சமீபத்தில் அமெரிக்காவின் மெட்டா இன்ஜினியரிங் தலைவரான பாலாஜி குருராஜன், 18 ஆண்டுகளுக்குப் பிறகு அவர் அமெரிக்காவில் இருந்து பெங்களூருக்கு இடம் பெயர்வதாக அறிவித்தார்.