தீபாவளி நேரம்: '5 நாள்களில் ரூ.3,080' ஏறும் தங்கம் விலை! அடுத்து தங்கம் விலை ஏறுமா, குறையுமா? | Gold

கடந்த வாரம் சரியாக இதே நாளில், அதாவது சனிக்கிழமை (அக்டோபர் 31) சென்னையில் ஒரு பவுன் தங்கம் விலை ரூ.1.01 லட்சத்திற்குச் சென்றது.

‘அட... தீபாவளியும் வருது. தங்கம் விலையுமே குறையுதே’ என்ற மகிழ்ச்சி, திங்கட்கிழமையே (நவம்பர் 2) பறந்துவிட்டது. கடந்த ஐந்து நாள்களில் தங்கம் விலை கிராமுக்கு ரூ.385-உம், பவுனுக்கு ரூ.3,080-உம் ஏறிவிட்டது.

ஏறுமுகத்திற்கு என்ன காரணம்?

இன்று சென்னையில் தங்கம் கிராமுக்கு ரூ.13,160-க்கும், பவுனுக்கு ரூ.1,05,280-க்கும் விற்பனையாகி வருகிறது. இந்த ஏற்றத்திற்கு மிக முக்கியக் காரணம் அமெரிக்க நாடாளுமன்றத் தேர்தல் முடிவுகளே.

இந்தத் தேர்தலில் அமெரிக்க அதிபர் ட்ரம்பின் குடியரசுக் கட்சி பின்னடைவைச் சந்தித்துள்ளது. இதனால், ஈரான் போரில் இதுவரை ட்ரம்பிற்கு இருந்த வலுவான அதிகாரம் சற்று குறைந்துள்ளது.

ஜனநாயகக் கட்சி ஆரம்பத்திலிருந்தே ஈரான் போருக்கு எதிராக உள்ளது. இப்போது அந்தக் கட்சிதான் அமெரிக்க நாடாளுமன்றத்தில் பெரும்பான்மையைப் பெற்றுள்ளது.

இதனால், ஈரான் போரைத் தொடருவதில் ட்ரம்பிற்கு நாடாளுமன்றத்தில் சிக்கல் ஏற்படலாம். ஆனால், அவருக்கு வீட்டோ அதிகாரம் உண்டுதான்.

அடுத்து என்ன?

இருந்தாலும், ஏற்கெனவே ஈரான் போரில்தான் ட்ரம்பின் கட்சி தோல்வியைச் சந்தித்துள்ளது. இதனால், வீட்டோ அதிகாரத்தைப் பயன்படுத்தி ஈரான் போரைத் தொடர்வதில் ட்ரம்ப் ஆர்வம் காட்டமாட்டார் என்று எதிர்பார்க்கப்படுகிறது.

இதனால், சர்வதேச சந்தையில் கச்சா எண்ணெய் விலை சரிந்து வருகிறது. இதன் தாக்கமாக, இன்னொரு பக்கம், தங்கம் விலை ஏறி வருகிறது.

அமெரிக்கத் தேர்தல் முடிவுகள் வெளியானது, கடந்த 5-ம் தேதி தங்கம் விலை பவுனுக்கு ரூ.1.07 லட்சத்தைத் தாண்டியது. அதன்பிறகு, இப்போது குறைந்து ரூ.1.05 லட்சத்திற்கு வர்த்தகமாகி வருகிறது. இதனால், இதுவே நல்ல இறக்கம் என்று நினைத்துக்கொள்ள வேண்டியதுதான்.

ஈரான் போர் மீண்டும் தொடராமல் இருந்தால், தங்கம் விலை ஏறுமுகத்தைக் காணும். இல்லையென்றால், தங்கம் விலை மீண்டும் சரியத் தொடங்கும் என்று பொருளாதார நிபுணர்கள் குறிப்பிடுகிறார்கள்.