சுனாமி குடியிருப்பில் புதுச்சேரி ஆட்சியா் ஆய்வு

புதுச்சேரி காலாப்பட்டு சுனாமி குடியிருப்பில் மாசடைந்த குடிநீா் விநியோகிக்கப்படுவதாக கூறப்படும் நிலையில், மாவட்ட ஆட்சியா் அ.குலோத்துங்கன் வெள்ளிக்கிழமை சம்பந்தப்பட்ட பகுதிகளில் ஆய்வு மேற்கொண்டாா்.

புதுச்சேரி காலாப்பட்டு தொகுதியில் சுனாமி குடியிருப்பு உள்ளது. இங்கு, விநியோகிக்கப்படும் குடிநீரில் புழுக்கள் கலந்துவருவதாக புகாா் எழுந்தது.

இந்த நிலையில், புதுச்சேரி மாவட்ட ஆட்சியா் அ.குலோத்துங்கன் சுனாமி குடியிருப்புக்கு வந்து ஆய்வு செய்தாா்.

அதன்பிறகு, அவா் புட்டிகளில் குடிநீரைப் பிடித்து, அதில் மாசு கலந்துள்ளதா எனப் பாா்வையிட்டாா். அந்த குடிநீரை ஆய்வகத்தில் பரிசோதனைக்கு உள்படுத்தவும் அதிகாரிகளுக்கு அவா் உத்தரவிட்டாா்.

மேலும், சுனாமி குடியிருப்பில் அமைந்துள்ள தண்ணீா் சேமிப்புக் கிடங்கு, மேல்நிலை நீா் தேக்கத் தொட்டிகள் ஆகியவற்றையும் அவா் பாா்வையிட்டு, அவை தூய்மையாக உள்ளனவா என ஆய்வு செய்தாா்.

இந்த ஆய்வின்போது, உழவா்கரை நகராட்சி ஆணையா் சுரேஷ்ராஜ், பொதுப் பணித் துறை பொறியாளா்கள் உள்ளிட்டோா் உடனிருந்தனா்.