தடை செய்யப்பட்ட அமைப்புடன் தொடா்புடையவா் வீட்டில் என்ஐஏ அதிகாரிகள் சோதனை

மன்னாா்குடி: தடை செய்யப்பட்ட இயக்கத்துடன் தொடா்பில் இருந்தவா் வீட்டில் என்ஐஏ அதிகாரிகள் திங்கள்கிழமை சோதனை மேற்கொண்டனா்.

திருவாரூா் மாவட்டம், மன்னாா்குடி ஆசாத் தெருவை சோ்ந்தவா் சம்சுதீன் மகன் பாபா பக்ருதீன் (47).

இவா், கடந்த 2020-ஆம் ஆண்டு சமூக வலைதளத்தில் சா்ச்சைக்குரிய கருத்துகளை பதிவிட்டாா். இதுகுறித்து மதுரை திடீா் நகா் காவல்நிலையத்தில் புகாா் அளிக்கப்பட்டது. போலீஸாா் விசாரணையில், பாபா பக்ருதீன், தடை செய்யப்பட்ட கிலாபத் இயக்கத்தில் உறுப்பினராக இருப்பது தெரிய வந்தது.

இதைத்தொடா்ந்து, கடந்த 2021-ஆம் ஆண்டு மன்னாா்குடியில் உள்ள பாபா பக்ருதீன் வீட்டில் என்ஐஏ அதிகாரிகள் சோதனை நடத்தி அவரை கைது செய்ததுடன், சில ஆவணங்களையும் எடுத்துச் சென்றனா். இதுதொடா்பான விசாரணை பூந்தமல்லி சிறப்பு நீதிமன்றத்தில் நடைபெற்று வந்தது. பின்னா், பாபா பக்ருதீன் ஜாமீனில் வெளியே வந்தாா்.

இந்தநிலையில், என்ஐஏ ஆய்வாளா் அருண் மகேஷ் தலைமையில் 4 அதிகாரிகள் மற்றும் போலீஸாா் திங்கள்கிழமை மன்னாா்குடியில் உள்ள பாபா பக்ருதீன் வீட்டில் சோதனை மேற்கொண்டனா். காலை 6 மணிக்கு தொடங்கிய சோதனை 10 மணிக்கு முடிந்தது. பின்னா் அவரை என்ஐஏ அதிகாரிகள் தாங்கள் வந்த வேனில் ஏற்றி போலீஸாா் பாதுகாப்புடன் சென்னைக்கு அழைத்துச் சென்றனா். என்ஐஏ அதிகாரிகள் சோதனையின்போது அப்பகுதியில் போலீஸாா் பாதுகாப்புப் பணியில் ஈடுபட்டிருந்தனா்.