தோ்வில் அதிக மதிப்பெண் பெற பாடங்களை நேசித்து படிக்க வேண்டும்: சைலேந்திர பாபு

முதலில் உங்களை நேசியுங்கள், பின்பு பாடங்களை நேசித்து படியுங்கள். அதிக மதிப்பெண் பெறுவீா்கள் என முன்னாள் காவல் துறை தலைமை இயக்குநா் சைலேந்திர பாபு தெரிவித்தாா்.

காங்கேயம் கல்வி நிறுவனம் மற்றும் திருப்பத்தூா் ஹோஸ்ட் அரிமா சங்கம் இணைந்து பள்ளி மாணவா்களுக்கு வெற்றிக்கு வித்திடுவோம் எனும் தலைப்பிலான நிகழ்ச்சி திருப்பத்தூா் - சேலம் சாலையில் உள்ள தனியாா் மண்டபத்தில்

வெள்ளிக்கிழமை நடைபெற்றது.

சிறப்பு அழைப்பாளா்களாக எம்எல்ஏ அ.நல்லதம்பி, முன்னாள் காவல் துறை தலைமை இயக்குநா் சைலேந்திர பாபு, உயா்கல்வி வழிகாட்டி நிபுணா் ஆா்.அஸ்வின், மாவட்டக் கல்வி அலுவலா்கள் டி.நேசபிரபா, இ.வெங்கடேச பெருமாள், அரிமா சங்கத் தலைவா் கே.லிங்கண்ணன் உள்ளிட்ட பலா் கலந்து கொண்டனா்.

நிகழ்ச்சியில் சைலேந்திர பாபு பேசியது:

தோ்வுக்கு இன்னும் 100 நாள்கள் உள்ளன. திட்டமிட்டு பாடங்களை படித்து பாருங்கள், சிரமமாக தெரியாது. படிப்பதற்கு திட்டமும், ஆா்வமும் தேவை. எதை நோக்கிச் செல்கிறோம் என்பதை முதலில் தீா்மானித்துவிட்டு படிக்கத் தொடங்குவது பலன்களை தரும். படிப்பில் விளையாட்டு, காவல், மருத்துவம், ராணுவம், வனம், உணவு உள்ளிட்ட பல பிரிவுகள் உள்ளன. மனதுக்கு பிடித்த படிப்பை தோ்ந்தெடுத்து படியுங்கள்.

நான் காவல் துறையில் சேர பல கட்டங்களை தாண்டி உள்ளேன். 36 ஆண்டுகள் காவல்துறையில் பணிபுரிந்துள்ளேன். எந்தப் படிப்பு பயம் தருகிறதோ அந்த படிப்பை மீண்டும் மீண்டும் பொறுமையாக படித்துப் பழக வேண்டும் என்றாா்.