நாகை: டிட்வா புயலால் இரவு முழுவதும் தொடர்ந்த மழை - கரையில் நிறுத்தப்பட்ட 3,700 மீன்பிடி படகுகள்

இலங்கையில் பாதிப்புகளை ஏற்படுத்தியிருக்கும் டிட்வா புயல் தமிழ்நாட்டை நோக்கி நகரும், கடலோர மாவட்டங்கள் கூடுதல் எச்சரிக்கையுடன் இருக்க வேண்டும் என வானிலை ஆய்வு மையம் கூறியிருக்கிறது. சென்னைக்கு தெற்கே 430 கி.மீ. தொலைவில் டிட்வா புயல் மையம் கொண்டுள்ளது. கடந்த 6 மணி நேரமாக 7 கி.மீ. வேகத்தில் வடக்கு வடமேற்கு திசையை நோக்கி நகர்ந்து வருகிறது.

நாளை அதிகாலையில் வட தமிழ்நாடு, புதுச்சேரி, நாகை மற்றும் அதனை ஒட்டிய கடற்கரை அருகே வங்கக்கடலை வந்தடையும் என்று வானிலை ஆய்வு மையம் அறிவித்துள்ளது. டிட்வா புயல் காரணமாக தஞ்சாவூர், திருவாரூர், நாகப்பட்டினம் உள்ளிட்ட டெல்டா மாவட்டங்களில் தொடர்ந்து மழை பெய்து வருகிறது. குறிப்பாக கடற்கரை ஒட்டிய பகுதிகளில் கன மழை பெய்து வருகிறது. நாகப்பட்டினத்தில் நேற்று பகல் பொழுதில் தரைக்காற்று வேகமாக வீசியது. கடல் சீற்றத்துடன் காணப்பட்டது.

மழை நீர் புகுந்தது

இதையடுத்து நேற்று மாலையில் இருந்து மழை பெய்ய தொடங்கியது. இரவு முழுவதும் தொடர்ந்து பல இடங்களில் கன மழை பெய்தது. தற்போதும் மழை தொடர்கிறது. இதனால் நாகை நகராட்சிக்குட்பட்ட வள்ளியம்மை நகர் பகுதிக்குள் மழை நீர் புகுந்தது. இங்கு சுமார் 50 குடும்பங்கள் வாழ்கிறார்கள். இப்பகுதியில் முறையான வடிகால் வசதி இல்லாததால் மழை காலங்களில் தொடர் பிரச்சனைகளை சந்தித்து வருகின்றனர். கனமழை தொடர்ந்தால் வீடுகளுக்குள் மழை நீர் புகும் நிலை ஏற்படும் என்கிறார்கள்.

இது குறித்து மீனவர்கள் உள்ளிட்ட சிலரிடம் பேசினோம், `டிட்வா புயலால் கடல் சீற்றத்துடன் காணப்படுகிறது. தொடர் மழையால் மக்களின் இயல்பு வாழ்க்கை வெகுவாக பாதிக்கப்பட்டுள்ளது. நாகப்பட்டினத்தை பொறுத்தவரை கோடியக்கரை, வேதாரண்யம், வேளாங்கண்ணி பகுதிகளில் மழை அதிகளவில் பெய்துள்ளது. கடந்த பத்து நாட்களுக்கு மேலாக மழை பெய்து வருவதால் நாகையில் சம்பா, தாளடி நெற்பயிர் நீரில் மூழ்கி அழுகும் நிலை ஏற்பட்டுள்ளது.

தற்போது மேலும் மழை தொடர்ந்து வருவதால் விவசாயிகள் கவலையில் ஆழ்ந்துள்ளனர். இதே போல், நாகை மாவட்டத்தில் 580 விசைப்படகுகள், 3,200 பைபர் படகுகள் உள்ளன. டிட்வா புயல் காரணமாக மீனவர்கள் கடலுக்கு செல்லக்கூடாது என மீன் வளத்துறை அறிவித்ததை தொடர்ந்து கடந்த ஒரு வாரத்திற்கு மேலாக மீனவர்கள் கடலுக்கு மீன் பிடிக்க செல்லவில்லை.

கடலில் மீன் பிடித்து கொண்டிருந்த மீனவர்களும் கரை திரும்பி விட்டனர். இதிதொடர்ந்து, விசை மற்றும் பைபர் படகுகள் கரையில் நிறுத்தி வைத்துள்ளனர். மறு அறிவிப்பு வந்த பிறகே கடலுக்கு செல்ல வேண்டும் என அறிவிக்கப்பட்டுள்ளது. இதனால் மீனவர்கள் வாழ்வாதாரம் இழந்துள்ளனர். இங்கு புயல் வந்தடைந்தால் காற்று அதிகமாக இருக்கும் கடல் சீற்றமும் அதிகமாக இருக்கும் என்கிறார்கள். மாவட்ட நிர்வாகம் பல்வேறு பாதுக்காப்பு ஏற்பாடுகளை முன்னெச்சரிக்கையாக செய்துள்ளது” என்றனர்.