'நான் தமிழ் ஈழப்பெண்'- நடிகை மைத்ரேயி ராமகிருஷ்ணன் பேச்சுக்கு எழுந்த எதிர்ப்பு! பின்னணி என்ன?

நெட்பிளிக்ஸில் 2020 ஆம் ஆண்டு வெளியான 'Never Have I Ever' தொடர் மூலம் புகழ்பெற்றவர் மைத்ரேயி ராமகிருஷ்ணன்.

கன்னடாவில் பிறந்து வளர்ந்த மைத்ரேயி ராமகிருஷ்ணன். தமிழ் பின்னணியைக் கொண்டவர். இலங்கை இவரது பூர்வீகம்.

இவர் பேசும் தமிழால் சமூக வலைத்தளங்களில் கவனத்தை ஈர்த்து பிரபலமாகினார்.

தன்னை ஒரு ஈழத் தமிழ் பெண்ணாக கனடாவைச் சேர்ந்த நடிகை மைத்ரேயி ராமகிருஷ்ணன் அடையாளப்படுத்திக் கொண்டது தற்போது விவாதப் பொருளாக மாறியிருக்கிறது.

நெட்ப்ளிக்ஸில் வெளியாகியுள்ள சர்வதேச காமெடி டான்ஸ் படமான 'BEST OF BEST'-ல் நடிகை மைத்ரேயி ராமகிருஷ்ணன் நடித்திருக்கிறார்.

இது தொடர்பான நேர்காணல் ஒன்றில் பேசிய மைத்ரேயி ராமகிருஷ்ணன், தனது நாடு கனடா என்ற போதிலும் தனது வேர்கள் இலங்கையில் உள்ளதாகவும், 'தமிழ் ஈழப்பெண்' என்று என்னை அடையாளப்படுத்தவே விரும்புகிறேன் என்றும் கூறியிருக்கிறார்.

ஈழம் என்ற வார்த்தையைப் பயன்படுத்தியதற்கும், இலங்கை அடையாளத்திலிருந்து தன்னை விலக்கிக்கொள்ள மைத்ரேயி முயல்வதாக கூறி, இலங்கையில் மைத்ரேயி ராமகிருஷ்ணனுக்கு கடும் எதிர்ப்புகள் கிளம்பியுள்ளன.

குறிப்பாக இலங்கையில் மைத்ரேயியின் திரைப்படத்திற்கு இணையதளங்களில் குறைந்த மதிப்பெண்களையும் எதிர்மறை விமர்சனங்களையும் வழங்குமாறு பிரச்சாரம் செய்து வருவதாகத் தகவல்கள் வெளியாகி இருக்கிறது.

அதேவேளையில், புலம்பெயர்ந்து வாழும் தமிழ் மக்களும் பல ரசிகர்களும் மைத்ரேயிக்கு ஆதரவாகக் குரல் கொடுத்து வருகின்றனர்.