புதுச்சேரியை உலுக்கிய 9 வயது சிறுமியின் கொலை - தூக்கு தண்டனை ஆயுள் தண்டனையாகக் குறைக்கப்பட்டது ஏன்?

புதுச்சேரி, முத்தியால்பேட்டையைச் சேர்ந்த ஒன்பது வயது சிறுமி, கடந்த 2024 மார்ச் மாதம் வீட்டில் விளையாடிக் கொண்டிருந்தபோது மாயமானார். அது தொடர்பாக போலீஸார் வழக்குப் பதிவு செய்து விசாரணை செய்து வந்த நிலையில், இரண்டு நாள்களுக்குப் பிறகு அதே பகுதியிலுள்ள கழிவு நீர் வாய்க்காலில், பாலியல் வன்கொடுமை செய்யப்பட்ட சிறுமி, கை, கால்கள் கட்டப்பட்டு சடலமாக மீட்கப்பட்டார்.

சிறுமியின் உடல் கதிர்காமம் அரசு மருத்துவக் கல்லூரி மருத்துவமனைக்கு எடுத்துச் செல்லப்பட்டது. ஆனால் அரசு மருத்துவமனையில் உடற்கூராய்வு செய்யக் கூடாது என்றும், ஜிப்மர் மருத்துவமனையில்தான் செய்ய வேண்டும் என்றும் அப்பகுதி மக்கள் வலியுறுத்தினர்.

அதையடுத்து சிறுமியின் உடல், கதிர்காமம் அரசு மருத்துவமனையில் இருந்து ஜிப்மர் மருத்துவமனைக்கு எடுத்துச் செல்லப்பட்டது. ஒன்பது வயது சிறுமி கொடூரமாகக் கொலை செய்யப்பட்ட சம்பவம், ஒட்டுமொத்த புதுச்சேரியையும் போராட்டக்களமாக மாற்றியது.

முத்தியால்பேட்டை காவல் நிலைய போலீஸார், கூண்டோடு இடமாற்றம் செய்யப்பட்டனர். எம்.பி கனிமொழி, முன்னாள் முதல்வர் எடப்பாடி பழனிசாமி தொடங்கி ராகுல் காந்தி வரை கண்டனம் தெரிவித்ததால், தேசிய அளவில் கவனம் பெற்றது சிறுமியின் கொடூரக் கொலை. 

சிறுமியின் உடற்கூராய்வு நடைபெற்ற ஜிப்மர் மருத்துவமனை தொடங்கி, புதுச்சேரி முழுவதும் தன்னெழுச்சியாக சிறுமிக்கு நீதி கேட்டு போராட்டங்கள் வெடித்தன. முத்தியால்பேட்டை, கோட்டக்குப்பம் பகுதிகளைச் சேர்ந்த வணிகர்கள், தாங்களாகவே கடைகளை அடைத்தனர்.

கிராமப்புறப் பகுதிகளில் தங்கள் பெண் குழந்தைகளுடன், கொலை செய்யப்பட்ட சிறுமியின் புகைப்படத்தை செல்போன்களில் ஏந்தி பெண்கள் சாலை மறியலில் ஈடுபட்டனர். பல இடங்களில் போராட்டக்காரர்கள் மீது தடியடி நடத்தி போராட்டங்கள் முடிவுக்குக் கொண்டு வரப்பட்டன. 

புதுச்சேரி, தமிழகத்தை உலுக்கிய இந்த வழக்கில், அதே பகுதியைச் சேர்ந்த விவேகானந்தன் என்ற முதியவரும், கருணாஸ் என்ற இளைஞரும் கைது செய்யப்பட்டனர். அவர்களிடம் மேற்கொள்ளப்பட்ட விசாரணையில், கஞ்சா மற்றும் மது போதையில் சிறுமியைப் பாலியல் வன்கொடுமை செய்து, அதன்பிறகு கொலை செய்து வாய்க்காலில் வீசியது தெரிய வந்தது.

வழக்கு விசாரணையில் இருக்கும்போதே கடந்த 2024-ம் ஆண்டு விவேகானந்தன் சிறையிலேயே தூக்குப் போட்டு தற்கொலை செய்து கொண்டார். அதையடுத்து அவரை வழக்கிலிருந்து விடுவித்த போக்சோ சிறப்பு நீதிமன்றம், கருணாஸ் மீதான வழக்கை மட்டும் விசாரணை செய்தது.

கருணாஸ் மீது போலீஸார் சுமத்திய அனைத்துக் குற்றச்சாட்டுகளும் நிரூபிக்கப்பட்டதாகக் கூறி, அவருக்கு தூக்கு தண்டனை விதித்தது போக்சோ நீதிமன்றம்.

அந்தத் தீர்ப்பை உறுதி செய்வதற்காக, கருணாஸ் வழக்கு சென்னை உயர் நீதிமன்றத்துக்கு அனுப்பி வைக்கப்பட்டது. இதற்கிடையில் தன்னுடைய தூக்கு தண்டனையை எதிர்த்து சென்னை உயர் நீதிமன்றத்தில் மேல் முறையீடு செய்திருந்தார் கருணாஸ்.

அவரது மனுவை உயர் நீதிமன்ற நீதிபதிகள் அனிதா சுமந்த், சுந்தர் அமர்வு விசாரணை செய்து வந்தது. நேற்று அந்த வழக்கு மீண்டும் விசாரணைக்கு வந்தது. அப்போது பேசிய நீதிபதிகள், ``கருணாஸ் மீது சுமத்தப்பட்டிருக்கும் கொலைக் குற்றச்சாட்டு எந்தவித சந்தேகத்திற்கு இடமின்றி நிரூபிக்கப்பட்டிருக்கிறது.

ஆனால் போக்சோ சட்டத்தின் கீழ் சுமத்தப்பட்ட பாலியல் வன்கொடுமை குற்றச்சாட்டு நிரூபிக்கப்படவில்லை. அதனால் கருணாஸ் அவர்களுக்கு கீழ் நீதிமன்றம் வழங்கிய தூக்கு தண்டனையை ஆயுள் தண்டனையாக குறைக்கிறோம்” என்று தீர்ப்பளித்தனர்.