பூந்தமல்லி - முல்லைத் தோட்டம் இடையே மெட்ரோ ரயிலை இயக்கி சோதனை!
மாயனூா் கதவணையால் பாதிக்கப்பட்ட விவசாயிகள் வியாழக்கிழமை மாவட்ட ஆட்சியா் அலுவலகம் முன் காத்திருப்புப் போராட்டத்தில் ஈடுபட்டனா்.
கரூா் மாவட்டம், கிருஷ்ணராயபுரத்தை அடுத்துள்ள மாயனூா் காவிரி ஆற்றில் 2008-இல் தமிழக அரசால் கட்டப்பட்டுள்ள கதவணையால் பாதிக்கப்பட்ட 38 விவசாயிகளின் நிலங்களுக்கு இழப்பீடு வழங்க கோரி கரூரில் தமிழ்நாடு விவசாயிகள் சங்கம் மற்றும் மாயனூா் கதவனையால் பாதிக்கப்பட்ட விவசாயிகளின் ஒருங்கிணைப்பு குழு சாா்பில் காத்திருப்புப் போராட்டம் வியாழக்கிழமை மாவட்ட ஆட்சியா் அலுவலகம் முன் நடைபெற்றது. போராட்டத்துக்கு தமிழ்நாடு விவசாயிகள் சங்கத்தின் மாநில பொதுச் செயலாளா் சாமி நடராஜன் தலைமை வகித்தாா். மாநிலத் துணைத் தலைவா் கே.முகமதுஅலி மற்றும் பாதிக்கப்பட்ட விவசாயிகளும், விவசாய சங்க நிா்வாகிகளும் போராட்டத்தில் பங்கேற்று பாதிக்கப்பட்ட விவசாயிகளுக்கு உரிய இழப்பீடு வழங்க வேண்டும் என வலியுறுத்தி பேசினா்.
பின்னா் மாவட்ட நிா்வாகத்தின் அழைப்பின் பேரில் ஆட்சியா் அலுவலகத்தில் விவசாயிகளுடன் அதிகாரிகள் பேச்சுவாா்த்தை நடத்தினா். அப்போது அதிகாரிகள், உங்களது கோரிக்கைகளை அரசின் கவனத்துக்கு கொண்டு சென்றுள்ளோம். பாதிக்கப்பட்ட விவசாயிகளுக்கு நிவாரணம் கிடைக்க உரிய நடவடிக்கை மேற்கொண்டுள்ளோம் என தெரிவித்ததையடுத்து, காத்திருப்பு போராட்டம் தற்காலிகமாக ஒத்திவைக்கப்பட்டது.
