`மோர் வயிற்றை கெடுக்கும், அதனால் பீர் குடிங்க!' - வீடியோ வெளியிட்ட ரெஸ்டோ பார்; சீல் வைத்த ஆட்சியர்

யூனியன் பிரதேசமான புதுச்சேரி, தன்னுடைய வருவாய்க்காக பெரிதும் நம்பியிருப்பது கலால் வரியைத்தான். அதன் காரணமாகவே மது மீதான மாநில அரசின் வரியைக் குறைத்து அண்டை மாநில சுற்றுலாப் பயணிகளைக் குறி வைக்கிறது. இந்த நிலையில் கடந்த 2021-ல் பா.ஜ.க கூட்டணியுடன் ஆட்சிக்கு வந்த முதல்வர் ரங்கசாமி, `பெருகி வரும் மக்கள் தொகைக்கு ஏற்ப மதுக்கடைகளின் எண்ணிக்கையையும் அதிகப்படுத்த வேண்டும்.

புதுச்சேரியை ஸ்பிரிச்சுவல் பூமி என்று சொல்கிறீர்கள். ஆனால் ஸ்பிரிட்டில்தான் நமக்கு வருவாய் கிடைக்கிறது' என்று சட்டப்பேரவையிலேயே வெளிப்படையாகத் தெரிவித்தார். அது உண்மையும் கூட என்பது வேறு விஷயம். அதையடுத்து குறுகிய காலத்திலேயே சுற்றுலாப் பிரிவின் கீழ் `ரெஸ்டோ பார்' என்ற பெயரில் லைசென்ஸ்களை வாரி இறைத்தது கலால்துறை.

அதன் விளைவாக பள்ளி, கல்லூரிகள், கோயில்கள், குடியிருப்புப் பகுதிகள் என எந்தவித கட்டுப்பாடுகளுமின்றி, வீதிக்கு பத்து என்ற விகிதத்தில் ரெஸ்டோ பார்கள் திறக்கப்பட்டன. அதன் விளைவாக முன்பு வார இறுதியில் மட்டும் புதுச்சேரியை நோக்கிப் படையெடுத்த அண்டை மாநில மதுப் பிரியர்கள், வார நாட்களிலும் குவிந்து வருகின்றனர். இது ஒருபுறமிருக்க மதுப்பிரியர்களை ஈர்ப்பதற்காக, தங்கள் கடைகளுக்கு ஆண்களுடன் வரும் பெண்களுக்கு மது இலவசம் போன்ற சலுகைகளையும் அறிவிக்கின்றன சில ரெஸ்டோ பார்கள்.

புதுச்சேரி கலால் துறை விதிகளின்படி மதுபானக் கடைகள் மற்றும் விடுதிகள் தங்களது வளாகங்களில் வாடிக்கையாளர்களை மது அருந்தத் தூண்டும் வகையிலோ அல்லது மது விற்பனையை ஊக்குவிக்கும் வகையிலோ விளம்பரப் பலகைகள் வைப்பதற்கு தடை விதித்திருக்கிறது. மேலும், அவர்களைக் கவரும் விதமாக பரிசுப் பொருட்கள் மூலமாகவோ விளம்பரம் செய்யவும் கடுமையான தடை விதிக்கப்பட்டிருக்கிறது.

ஆனால் அதையும் மீறி, மதுபான சலுகைகளைக் குறிப்பிட்டு கடைகளின் வாசல்களிலும், பொது இடங்களிலும் பேனர்கள் வைக்கப்படுகின்றன. பொதுமக்கள் புகார்களின் அடிப்படையில் மாவட்ட நிர்வாகமும், கலால்துறையும் அவற்றை அகற்றுவதால், சமூக வலைத்தளங்களில் விளம்பரம் செய்ய ஆரம்பித்திருக்கின்றன ரெஸ்டோ பார்கள். ரெஸ்டோ பார்களில் இசைக்கப்படும் இசைகளுக்கு பெண்கள் நடனமாடும் வீடியோக்கள் வெளிப்படையாக, இன்ஸ்டாவில் பதிவேற்றம் செய்யப்படுகின்றன. அப்படி புதுச்சேரி திருவள்ளுவர் சாலையில் செயல்படும் ஒரு ரெஸ்டோ பாரின் உரிமையாளர், மதுப்பிரியர்களை ஈர்க்க ஒரு வீடியோவை வெளியிட்டிருந்தார்.

அந்த வீடியோவில், `எல் நினோ வெயிலுக்கு இளநீர் குடிக்கலாம். ஆனால் இரண்டுக்கு மேல் குடிக்க முடியாது. மோர் குடிக்கலாம். ஆனால் அதிகம் குடித்தால் வயிறு கெட்டுவிடும். அதனால் உங்களுக்கு அன்லிமிடெட் பீர் வேண்டுமா எங்களிடம் வாருங்கள்? ரூ.1,200... எத்தனை பீர் வேண்டுமானாலும் குடியுங்கள். ஆனால் இடையில் சிறுநீர் கழித்தால் அந்த சலுகை இல்லை' என்று பேசியிருந்தார். சிங்கப்பூர் சலூன் திரைப்படத்தில் சிறுநீர் கழிக்காமல் எவ்வளவு பீர் குடித்தாலும் இலவசம் என்று நடிகர் சத்யராஜிடம் சொல்வார் ஒய்.ஜி.மகேந்திரன்.

அந்தப் பாணியில் இருந்த இந்த விளம்பரத்தைப் பார்த்து அதிர்ந்து போன பொதுமக்கள், மதுப்பிரியர்களின் உயிருக்கு உலை வைக்கும் இந்த விளம்பரம் குறித்து கலால்துறைக்கும், மாவட்ட ஆட்சியருக்கும் புகாரளித்தனர். அதையடுத்து அந்தக் கடை மீது நடவடிக்கை எடுக்குமாறு கலால்துறைக்கு உத்தரவிட்டார் மாவட்ட ஆட்சியர் குலோத்துங்கன். அதனடிப்படையில் அந்தக் கடைக்கு சீல் வைத்த கலால்துறை, அவர்களின் இன்ஸ்டா பக்கத்தையும் அதிரடியாக நீக்கியிருக்கிறது.