Asian Games: இந்திய அணிக்கு தங்கப்பதக்கம்; வெள்ளி, வெண்கலம், தங்கம் வென்ற தமிழக வீராங்கனை வித்யா!

ஜப்பானில் நடைபெற்று வரும் ஆசிய விளையாட்டுப் போட்டிகளின் மகளிர் 400 மீட்டர் தடை தாண்டி ஓடும் போட்டிகளில் தமிழக வீராங்கனை வித்யா ராம்ராஜ் 54.75 வினாடிகளில் இலக்கை எட்டி வெண்கலப் பதக்கம் வென்றிருந்தார்.

1984-ஆம் ஆண்டில் லாஸ் ஏஞ்சல்ஸ் நகரில் நடைபெற்ற ஒலிம்பிக் போட்டிகளில் அப்போதைய இந்திய வீராங்கனையும், இப்போதைய இந்திய ஒலிம்பிக் சங்கத் தலைவருமான பி.டி.உஷா 55.42 வினாடிகளில் 400 மீட்டர் தொலைவைத் தடை தாண்டி கடந்ததுதான் இந்திய தேசிய சாதனையாக இருந்தது.

கடந்த 42 ஆண்டுகளாக முறியடிக்கப்படாமல் இருந்த பி.டி.உஷாவின் சாதனையை வித்யா முறியடித்திருந்தார். இவரின் இந்தச் சாதனையை பலரும் பாராட்டி வந்தனர்.

இந்நிலையில் தற்போது ஆசிய விளையாட்டுப் போட்டி 4X400 மீட்டர் தொடர் ஓட்டத்தில் இந்தியா தங்கப் பதக்கம் வென்று சாதனை படைத்திருக்கிறது. வித்யா ராம்ராஜ், பிராசி, கிரண் உள்ளிட்ட 4 பேர் கொண்ட இந்திய மகளிர் அணி தங்கம் வென்று அசத்தியிருக்கிறது.

நடப்பு ஆசிய விளையாட்டில், ஏற்கனவே கலப்பு 4 x 400 மீட்டர் தொடர் ஓட்டத்தில் வெள்ளி வென்ற இந்திய அணியிலும் வித்யா இடம்பெற்றிருந்தார். இதன் மூலம் ஆசிய விளையாட்டில் தமிழக வீராங்கனை வித்யா ராம்ராஜ் ஒரு தங்கம், ஒரு வெள்ளி, ஒரு வெண்கலம் வென்று வரலாற்று சாதனை படைத்திருக்கிறார்.