Bombay Creamery: ஐஸ்க்ரீம் சந்தையில் கால் பதித்த ரிலையன்ஸ்… ₹10-ல் தொடங்கும் புதிய போட்டி

இந்தியாவின் ஐஸ்க்ரீம் சந்தையில் களமிறங்கியிருக்கிறது ரிலையன்ஸ். முகேஷ் அம்பானி தலைமையிலான ரிலையன்ஸ் இண்டஸ்ட்ரீஸின் FMCG பிரிவான Reliance Consumer Products Limited (RCPL), ‘Bombay Creamery’ என்ற புதிய ஐஸ்க்ரீம் பிராண்டை அறிமுகப்படுத்தியுள்ளது.

‘தரமான ஐஸ்க்ரீம்… அனைவரும் வாங்கக்கூடிய விலையில்’ என்பதுதான் Bombay Creamery-யின் அடிப்படை அணுகுமுறை. உண்மையான பால் சார்ந்த பொருட்கள், குறிப்பாக real dairy cream பயன்படுத்தி தயாரிக்கப்படுவதாக நிறுவனம் தெரிவித்துள்ளது. ‘Global Quality at Affordable Price’ என்ற நிலைப்பாட்டுடன் இந்தப் பிராண்டை சந்தையில் கொண்டு வந்திருக்கிறது RCPL.

விலை விஷயத்திலும் ரிலையன்ஸ் கவனம் செலுத்தியுள்ளது. Bombay Creamery ஐஸ்க்ரீம்களின் விலை ₹10 முதல் தொடங்குகிறது. கோன், கப், டப், பார், ஸ்டிக் எனப் பல்வேறு வடிவங்களில் தயாரிப்புகள் அறிமுகமாகியுள்ளன. முதற்கட்டமாக மேற்கு இந்தியாவில் விற்பனை தொடங்கியுள்ள நிலையில், அடுத்தகட்டமாக நாடு முழுவதும் விரிவுபடுத்தப்பட உள்ளது.

குறைந்த விலை, உண்மையான டெய்ரி பொருட்கள் மற்றும் ரிலையன்ஸின் தேசிய அளவிலான விநியோகக் கட்டமைப்பு ஆகியவற்றை முன்வைத்து களமிறங்குகிறது Bombay Creamery. நிறுவனத்தின் தேசிய விநியோக வலையமைப்பு, சில்லறை விற்பனை அளவு மற்றும் நுகர்வோர் குறித்த சந்தைத் தகவல்கள் இந்தப் பிராண்டின் வளர்ச்சிக்குப் பயன்படுத்தப்படும் என RCPL தெரிவித்துள்ளது.

ரிலையன்ஸ் நிறுவனத்தின் நுகர்வோர் பொருட்கள் விரிவாக்கத்தில் இது அடுத்த முக்கிய நகர்வாகப் பார்க்கப்படுகிறது. தொலைத்தொடர்பு துறையில் Jioவும், குளிர்பான சந்தையில் Campaவும் விரிவுபடுத்தியுள்ள நிலையில், தற்போது ஐஸ்க்ரீம் சந்தையிலும் தனது தடத்தைப் பதிக்க ரிலையன்ஸ் களமிறங்கியுள்ளது.

RCPL இயக்குநர் T. Krishnakumar, “dairy shouldn't need shortcuts” என்ற எண்ணத்தின் அடிப்படையில்தான் Bombay Creamery உருவாக்கப்பட்டதாக தெரிவித்துள்ளார். உண்மையான டெய்ரி கிரீமைப் பயன்படுத்தி, ஒவ்வொரு முறையும் உண்மையான ஐஸ்க்ரீமின் சுவையை வழங்குவதுடன், இந்தியக் குடும்பங்கள் வாங்கக்கூடிய விலையில் அதை வழங்குவதே நோக்கம் என்றும் அவர் கூறியுள்ளார்.

ஏற்கெனவே Amul, Vadilal, Mother Dairy, Kwality Wall’s, Arun உள்ளிட்ட நிறுவனங்கள் வலுவாக இருக்கும் ஐஸ்க்ரீம் சந்தையில், ரிலையன்ஸின் இந்தப் புதிய வரவு கவனத்தை ஈர்த்துள்ளது. ₹10 முதல் விலை, உண்மையான டெய்ரி கிரீம் மற்றும் வலுவான விநியோகக் கட்டமைப்புடன் களமிறங்கியுள்ள Bombay Creamery, நாடு முழுவதும் விரிவடையும்போது இந்திய ஐஸ்க்ரீம் சந்தையில் போட்டியை மேலும் தீவிரப்படுத்தும் வாய்ப்பு உள்ளது.