Doctor Vikatan: குழந்தைகளைப் பாதிக்கும் பால் ஒவ்வாமை... மாற்று உணவுகள் உதவுமா?

Doctor Vikatan: என் குழந்தைக்கு 8 வயதாகிறது. இந்த வயதிலேயே அவளுக்கு பால் ஒவ்வாமை அதாவது லாக்டோஸ் இன்டாலரென்ஸ் உள்ளதாகச் சொல்கிறார் மருத்துவர். பால் பொருள்களைத் தவிர்க்குமாறு சொல்கிறார்.

குழந்தைகளுக்குப் பிரதான உணவான பால் கொடுக்காதபட்சத்தில், அதனால் கிடைக்கும் சத்துகளை எப்படி, எந்த உணவுகளின் மூலம் ஈடு செய்வது?

பதில் சொல்கிறார், சென்னையைச் சேர்ந்த,  குழந்தைகளுக்கான குடல், வயிறு மற்றும் கல்லீரல் நோய் மருத்துவர்,  மற்றும்  எண்டோஸ்கோபி நிபுணர் எம்.எஸ். விஸ்வநாதன்

லாக்டோஸ் சகிப்புத்தன்மை இல்லாத குழந்தைகள் பால் பொருள்கள் அனைத்தையும் தவிர்க்க வேண்டிய அவசியமில்லை. நொதித்தல் (fermentation) செயல்முறை காரணமாக பாலில் உள்ள லாக்டோஸ் அளவைக் குறைப்பதால், பல குழந்தைகளால் தயிர் மற்றும் யோகர்ட் (Yoghurt) ஆகியவற்றைச் செரிமானம் செய்ய முடியும். ஹார்டு சீஸ் (Hard cheeses) வகைகளிலும் பொதுவாக லாக்டோஸ் குறைவாகவே இருக்கும்.

உங்கள் குழந்தைக்கு  'லாக்டோஸ் ஃப்ரீ'  (Lactose-free) பால் சிறந்த மாற்றாக இருக்கும். சாதாரண பால், மில்க்‌ஷேக், ஐஸ்கிரீம் மற்றும் பாலினால் செய்யப்பட்ட இனிப்புகள் வயிற்று உப்புசம், வாயுத் தொல்லை, வயிற்று வலி அல்லது வயிற்றுப்போக்கு போன்ற அறிகுறிகளை ஏற்படுத்தக்கூடும்.

இருப்பினும், ஒவ்வொரு பாலின் சகிப்புத்தன்மையும் மாறுபடும் என்பதால், அனைத்துப் பால் பொருள்களையும்  முழுமையாக நிறுத்துவதற்குப் பதிலாக, எந்த உணவுகள் அசௌகர்யத்தை ஏற்படுத்துகின்றன என்பதை பெற்றோர் கவனிக்க வேண்டும்.

குழந்தைகளின் ஆரோக்கியமான வளர்ச்சிக்குத் தேவையான கால்சியம், புரதம் மற்றும் வைட்டமின் டி ஆகிய ஊட்டச்சத்துகள் போதுமான அளவில் கிடைப்பதை உறுதி செய்வது முக்கியம். ராகி, கீரை வகைகள், எள் மற்றும் கால்சியம் சத்து செறிவூட்டப்பட்ட உணவுகள் (calcium-fortified products) அவர்களின் ஊட்டச்சத்து தேவைகளைப் பூர்த்தி செய்ய உதவும்.

பால் பொருள்களைச் சாப்பிட்ட பிறகு தொடர்ந்து ஒவ்வாமைக்கான அறிகுறிகள் தென்பட்டால், அதற்கான காரணத்தை உறுதிசெய்து சரியான உணவு மாற்றங்களைத் திட்டமிட குழந்தைகள்நல மருத்துவரை (Paediatrician) அணுகவும்.

டாக்டர் எம்.எஸ். விஸ்வநாதன்:

சென்னை, அப்போலோ மருத்துவமனையில் குழந்தைகளுக்கான குடல், வயிறு மற்றும் கல்லீரல் நோய் மருத்துவராக இருக்கிறார். தவிர, இவர் கல்லீரல் மாற்று சிகிச்சை நிபுணரும், எண்டோஸ்கோபி நிபுணரும்கூட.

உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.