Doctor Vikatan: 40 வயதில் சர்க்கரை நோய்... குதிகாலில் வலி... காரணமும், தீர்வும் என்ன?

Doctor Vikatan: எனக்கு 40 வயதாகிறது. டைப் 2 நீரிழிவு நோய் (Type 2 Diabetes) உள்ளது. கடந்த சில மாதங்களாக எனது இடது குதிகாலின் பின்புறத்தில் வலி இருந்து வருகிறது.  நான் என்ன செய்ய வேண்டும்?

பதில் சொல்கிறார், சென்னையைச் சேர்ந்த பொது மருத்துவர் ஜெயஸ்ரீ கிருஷ்ணன்

40 வயது நிரம்பிய, டைப் 2 நீரிழிவு நோய் உள்ள ஒருவருக்கு பல மாதங்களாக குதிகாலின் பின்புறத்தில் தொடர்ச்சியாக வலி இருப்பது, விரிவான மருத்துவப் பரிசோதனைக்கு உட்படுத்தப்பட வேண்டிய விஷயம். இது Achilles tendinopathy என்ற பிரச்னையாக இருக்க வாய்ப்பு உண்டு. இது கெண்டைக்கால் தசைகளை குதிகால் எலும்புடன் இணைக்கும்  தசைநாரில் (Achilles tendon) ஏற்படும் எரிச்சல் அல்லது சிதைவு சார்ந்த பாதிப்பாகும்.

இது தவிர குதிகாலின் பின்புற வலிக்கு வேறு சில காரணங்களும் இருக்கலாம். அவை...

ரெட்ரோகால்கேனியல் பர்சிடிஸ் (Retrocalcaneal bursitis)... குதிகாலின் பின்புறம் உள்ள திரவம் நிறைந்த பையின் (bursa) வீக்கம் அல்லது அழற்சி.

அகில்லெஸ் தசைநார் கிழிவு (Achilles tendon rupture).

போஸ்டீரியர் ஆங்கிள் இம்பின்ஜ்மென்ட் (Posterior ankle impingement / entrapment syndrome)... அதாவது, கணுக்காலின் பின்புறத்தில் உள்ள திசுக்கள் அல்லது எலும்புகள் நசுக்கப்படுதல்.

கணுக்கால் மூட்டுவாதம் (Ankle arthritis).

இன்செர்ஷனல் அகிலெஸ் டெண்டினோபதி (Insertional Achilles tendinopathy)... அதாவது  குதிகாலின் பின்புறத்தில் எலும்பு கூடுதல் அல்லது எலும்பு வளர்ச்சி.

அடிப்படைக் காரணம் எதுவாக இருந்தாலும், கட்டுப்பாடற்ற  ரத்தச்சர்க்கரை அளவு வீக்கத்தை அதிகரிக்கலாம், வலியை தீவிரப்படுத்தலாம் மற்றும் குணமாவதைத் தாமதப்படுத்தலாம். நீண்ட காலமாக ரத்தத்தில் சர்க்கரை அளவு அதிகமாக இருப்பது தசைநார் ஆரோக்கியத்தை பாதிக்கும். திசுக்கள் குணமாவதைத் தடுக்கும். பாதம் தொடர்பான சிக்கல்களின் அபாயத்தை அதிகரிக்கும் என்பதால், நீரிழிவு நோய் என்பது இதில் மிக முக்கியமாக கவனத்தில் கொள்ளப்பட  வேண்டியது. எனவே, தொடர்ச்சியான குதிகால் வலியைப் புறக்கணிக்கக் கூடாது. உடனடியாக மருத்துவ ஆலோசனை மற்றும் சரியான சிகிச்சையைப் பெற வேண்டும்.

நீங்கள் முதலில் எலும்பியல் சிகிச்சை மருத்துவரை (Orthopaedic specialist) அணுகவும். முறையான மருத்துவப் பரிசோதனையின் மூலம்தான் வலிக்கான காரணத்தைக் கண்டறிய முடியும். தேவைப்பட்டால் ஸ்கேன் (Ultrasound) அல்லது பிற இமேஜிங் சோதனைகள் பரிந்துரைக்கப்படலாம்.

குதிகால் மீதான அழுத்தத்தைக் குறைக்க வேண்டியது முக்கியம்.  ஓடுதல், குதித்தல், நீண்ட நேரம் நிற்பது மற்றும் வலியை அதிகரிக்கும் செயல்பாடுகளைத் தவிர்க்கவும். குஷன் (cushioning) தன்மை கொண்ட காலணிகளைத் தேர்ந்தெடுக்கவும், வெறுங்காலுடன் நடப்பதைத் தவிர்க்கவும்.

துணியில் சுற்றப்பட்ட ஐஸ் கட்டியை வலி உள்ள இடத்தில்  10-15 நிமிடங்கள் வைக்கவும்.  நீரிழிவு நோயினால் உணர்ச்சித் திறன் குறைந்திருந்தால், ஐஸை நேரடியாக சருமத்தில் படும்படி வைக்க வேண்டாம்.

ரத்தச்சர்க்கரை அளவைக் கட்டுப்படுத்த வேண்டியது மிக முக்கியம். உங்கள் ரத்தச் சர்க்கரை அளவைக் கண்காணித்து, உங்களுக்குப் பரிந்துரைக்கப்பட்ட நீரிழிவு மருந்துகளைத் தவறாமல் எடுத்துக் கொள்ளுங்கள். ரத்தச் சர்க்கரையைக்  கட்டுப்பாட்டில் வைத்திருப்பது, திசுக்கள் குணமடைய உதவுவதோடு, சிக்கல்களின் அபாயத்தையும் குறைக்கிறது.

சுய மருத்துவம் செய்வதைத் தவிர்க்கவும்.  மருத்துவ ஆலோசனையின்றி வலி நிவாரணிகள், ஸ்டீராய்டு ஊசிகள் அல்லது கடுமையான ஸ்ட்ரெச்சிங் பயிற்சிகளை (stretching exercises) தொடங்க வேண்டாம்.

உங்களுக்குத் திடீரென கடுமையான வலி, சத்தம் (popping sensation) கேட்பது, எடையைத் தாங்க முடியாமை, கடுமையான வீக்கம், சிவந்து போதல், சூடான உணர்வு, காயம் அல்லது காய்ச்சல் ஏற்பட்டால் உடனடியாக மருத்துவரை அணுகுங்கள். நீரிழிவு உள்ள ஒருவருக்கு பாதம் சிவந்து, சூடாகவும், வீக்கமாகவும் இருப்பது உடனடி மருத்துவப் பரிசோதனைக்கு உட்படுத்தப்பட வேண்டிய அறிகுறி.

வலி பல மாதங்களாகத் தொடர்வதாலும், உங்களுக்கு நீரிழிவு நோய் இருப்பதாலும், வீட்டிலேயே சுய மருத்துவம் செய்வதை விட்டுவிட்டு, நேரில் சென்று மருத்துவப் பரிசோதனை செய்துகொள்ளுங்கள். ஆரம்பகால நோயறிதலும் சரியான சிகிச்சையும்  வேறு சிக்கல்கள் வராமல் தடுக்க உதவும்.


டாக்டர் ஜெயஸ்ரீ கிருஷ்ணன்:

சென்னை, வானகரம் அப்போலோ சிறப்பு மருத்துவமனையில் பொது மருத்துவராகப் பணிபுரிகிறார். இத்துறையில் 21 ஆண்டுகள் அனுபவம் உள்ளவர். 


உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.