Flydubai இணை விமானி ஹமாம் அல்ஹமாமி ‘இஸ்லாமியத் தீவிரவாதி’ - நெதன்யாகு சொன்னது என்ன?

ஃபிளைதுபாய் விமானத்தின் விபரீத சம்பவத்திற்குக் காரணமானவர் ஓமனைச் சேர்ந்த ஹமாம் அல்ஹமாமி என்று அடையாளம் காணப்பட்டுள்ளார்.

அவர் சிரியாவில் பெரும்பாலான நேரத்தைக் கழித்ததாகவும், அப்போதுதான் அவர் தீவிரவாதக் கருத்துகளால் ஈர்க்கப்பட்டுள்ளார் என்றும் கூறப்படுகிறது.

ஓமனில் உள்ள விமான நிறுவனம் ஒன்றான ‘ஓமன் ஏர்’ அவரை விமானியாக அதாவது விமானம் இயக்குவதிலிருந்து தடை செய்திருக்கிறது.

இதையெல்லாம் தாண்டிதான், அவர் ஃபிளைதுபாய் விமானத்தில் விமானியாகப் பணிக்குச் சேர்க்கப்பட்டுள்ளார்.

குறிப்பிட்ட விமானச் சம்பவத்திற்குப் பிறகு, ஹமாம் அல்ஹமாமி ‘என்னைக் கொன்றுவிடுங்கள்... என்னைக் கொன்றுவிடுங்கள்’ என்று கூறியதாக இஸ்ரேல் பிரதமர் நெதன்யாகு குறிப்பிட்டிருந்தார். இது தீவிரவாதப் பேட்டர்ன் என்றும் தெரிவித்திருந்தார்.

நேற்று நெதன்யாகு தனது எக்ஸ் பக்கத்திலும் ஹமாம் அல்ஹமாமி ‘இஸ்லாமியத் தீவிரவாதி’ என்று குறிப்பிட்டுள்ளார்.

நெதன்யாகு கூறுவதாவது...

“காலப்போக்கில், நிகழ்ந்த உண்மை நிலவரம் தெளிவாகி வருகிறது. யானிவும் அவரது வீரம் நிறைந்த தோழர்களும் இணைந்து ‘செப்டம்பர் 11’ பாணியிலான ஒரு மிகப்பெரிய பேரழிவைத் தடுத்துள்ளனர்.

அந்தத் தாக்குதல்தாரி இஸ்லாமியத் தீவிரவாதக் கருத்துக்களால் ஈர்க்கப்பட்டுத் தீவிரவாதியாக மாறியவன். அவன் விமானத்தையும் அதில் பயணித்த அனைத்துப் பயணிகளையும் அழிக்கும் நோக்குடனேயே இச்செயலைச் செய்துள்ளான்.

அவனை யாராவது இயக்கி அனுப்பினார்களா என்பது குறித்து நாம் தற்போது தீவிர விசாரணை நடத்தி வருகிறோம்.

அவனை அனுப்பியவர்கள் எவராக இருந்தாலும், அவர்கள் அதற்கு மிகக் கடுமையான விலையைக் கொடுக்க நேரிடும்.” என்றிருக்கிறார்.